Ka seng JSU War Jaintia Circle mynta ka sngi ka la leit ban jurip ia ka kali 108 kaba don ha Jaraiñ PHC hapoh Amlarem Sub-Division. Kum ban shu pynkynmaw ka seng JSU naduh u snem 2018 ka lah dawa ban ioh ia ka kali 108 hapoh Amlarem Sub-division hadien ba la kynriah noh shawei ia ka kali 108 na Amlarem Sub-division ha u snem 2014 bad ka jingdawa ka seng ka lah urlong hadien ba ka sorkar bad ka GVK ki lah ban pynpoi ia ka kali 108 ha Amlarem sub-division ha kine ki khyndiat bnai ba lah dep.
Kum ban nang pynjanai ia ka jingtreikam ka kali 108 ka kali kit nongpang ia ki paitbah ka thaiñ War Jaintia ki dkhot seng ki la leit hi dalade ban jurip da lajong ki khmat ban lap iaka jingduna ka rukom treikam bad ban nang pynjanai iaka rukom ai jingshakri ka 108 Ambulance sha u paitbah.
Na ka liang ka seng hadien ka jingud jingnam jong u paitbah ka thaiñ ki la shem shisha ba dang duna ki nongtrei lane ki nongsumar nongpang jong ka GVK ha Amlarem Sub-division bad don ruh ka khep ba ka kali Ambulance 108 la hap ban shu set da ki taiew, kumta na ka liang ka seng ka dawa mardor na ka GVK bad na ka sorkar ban pynbiang iaki nongtrei jong ka 108 hapoh Amlarem Sub-division namar ia mynta ka seng ka lap ba dang duna shisha ki nongtrei khnang ban ym dkhoh ka jingai jingshakri ka kali 108 sha u paitbah ka thaiñ Amlarem Sub-division.
