Jowai, Risaw 05: U Deputy Chief Minister ka sorkar jylla u ma Sniawbhalang Dhar hynnin ka sngi u la leit ban jurip ïaka Namdong CHC, ha kane ka sngi la don lang u Waheh Shnong ma D.S. War, u Secretary Shnong ma Serus Lipon, ki nongïalam shnong bad ki riew Rangbah jong ka thaiñ.
Ha kane ka jingleit jurip u Symbud Myntri ula ïoh lad ban kynduh ïa i incharge Dr Arda Laloo bad kiwei ki Doctor kiba trei ha kane ka CHC. Naka Liang ka CHC kala ai daka jingthoh sha u Symbud Myntri ïaki jingduna bad jingdonkam jong kane ka CHC bad la ïa mir jingmut lang hapdeng ki nongtrei ka CHC ki nong ïalam shnong bad u Myntri uba dei dei ruh u MLA ka thaiñ, naka bynta ban pynbha bad ban pynbiang ïaki jing donkam jong kane ka CHC.
Naka liang u Symbud Myntri mynta ka sngi hi ula kular ban shimkhia ban pynbiang bad pynbha ïaka jing donkam ha kane ka CHC naduh ki Doctor ki Staff Nurse bad kiwei kiwei ki nongtrei. ula kular ruh ha khmat ki Doctor ki nong ïalam shnong ki riew Rangbah ka thaiñ ba un shna noh da u surok rong ban poi sha CHC ban ai kawei Ambulance, ban ai rong noh ïaka Building bad baroh ki Quater jong kane ka CHC.
Shuh shuh ula kyntu ruh ïa baroh ki nong trei ba kin trei hok bad ba kin don haka duty bad ban don ka jingïa trei lang ha pdeng ka CHC bad ki bor Shnong khnang ba kan wan rah ïaka jing myntoi ïa ki paidbah ka thaiñ hi baroh kawei.
Kumta hadein kane ula leit peit ruh ïaka jaka naka bynta ban shna ïaka ophis jong ka Namdong C&RD Block bad u la ïathuh ruh ba yn pyntrei kam pura ïaka Namdong Block khnang ba ki paidbah kim donkam shuh ban leit sha Thadlaskeiñ Block hynrei ki shnong kiba hap hapoh Namdong Block kin lah ban pyndep ïa ki kam hapoh ka Block la jong hi.
