: U Symbud Myntri Rangbah ka sorkar jylla u ma Sniawbhalang Dhar bad uba dei ruh u myntri ba khmih ïa ka tnat Industries, mynta ka sngi ula leit jngoh bad jurip ïa ka karkhana shna umsoh jong ka Varun Beverages Limited kaba don ha Mendipathar, ha North Garo Hills District.
Ha kane ka jingleit jurip, u symbud myntri rangbah ula pynpaw ka jingsngewkmen bad jingsarong ban ïohi ba ka jylla Meghalaya kala ïoh ïa kum kane ka karkhana kaba heh ha ka liang ka jingpynmih ïa ki umsoh. Kane ka karkhana ka pynmih ïa ki jingdih umsoh ba paw kum ka Pepsi, Mountain Dew, Slice bad 7UP bad kiwei de.
Shuh shuh u ma Sniawbhalang Dhar ula ong ka jingdon jong kane ka karkhana kan ïarap ban ai kam ai jam kumba 400 haduh 500 ngut ki nongtrei, kaba long ka kabu kaba khraw eh ïa ki samla bad ki nongshong shnong jong kane ka thaiñ.
Ula kdew ruh ba kane ka dei ka sien kaba nyngkong eh ha Meghalaya ban don kum kane ka karkhana ba heh (Large Scale) ban pynmih ïa kitei ki umsoh. La ong ba ka jingpynmih ïa ka umsoh mynta ka poi haduh kumba 2 lakh tylli (bottle) haka shi sngi bad ïa kine yn shalan ym tang hapoh ka jylla hynrei wat sha kiwei de ki jylla.
Halor kane ka jinglah ka jylla ban pynmih umsoh khambun u ma Sniawbhalang Dhar ula ong ba kane ka dei ka dak kaba shai ba ka jylla ka dang ïaid shaphrang haka liang jong ka ka roi ka par khamtam haka kam karkhana, haka juh ka por kan plie lad ïa ka ïoh kam ïoh jam jong ki paidbah ka jylla.
