Mynta ka sngi (2.7.2024) ka KSU Jowai Unit ha poh ka jingialam u Nidapoi Shadap, General Secretary ka Jowai Unit ha ryngkat ki dkhot jong ka bad ka jingsynran lang u Saimon Dkhar u ba long u Organising Secretary Jowai Circle ki la leit ban khang tala ia kawei na ki Bank kaba la tip kum ka Bandhan Bank kaba don ha Ladthaboh, Jowai.
Ia kane ka jingleit khang tala ka seng ia katei ka Bank ka dei namar ba ki nongtrei jong katei ka Bank kim burom shu ia ka sngi kyrpang jong ka jaitbynriew Khasi Pnar kaba dei ka shuti Behdieñkhlam ka Seiñraij Jowai, kaba la ai kyrpang da u Deputy Commissioner ka West Jaiñtia Hills District mynta ka 2 tarik.
Na ka liang ka seng kala ong ba kala lap ba man la ka por kane ka Bank ka shait ialeh pyrshah beit bad kam ju burom ia ki sngi kyrpang jong ka jaidbynriew. Ka Seng kala maham tyngeh ia kane ka Bank da kaba ong ba lada ka dang lap nangne shakhmat ba kim burom ia ki sngi kyrpang jong ka jaitbynriew kam banse ban leh da kawei pat ka synjam ba kham tyngeh, la bynrap u Ewanmi Phawa, President KSU Jowai Unit.
