Ki dkhot ka Executive Committee hapoh ka jingialam jong u Chief Executive Member ka KHADC u Bah Pyniaid Singh Syiem, ryngkat bad ki Executive Member jong ka KHADC ki la leit kynduh ia u lad ka Jylla mynta ka sngi ka 26 tarik Nailur halor ka jingsahteng ki hynniew tylli ki bill jong ka KHADC
Haba kren sha ki lad pathai khubor na ka liang u CEM ka KHADC u bah pyniaid Singh Syiem u la pyntip ba ka jingwan kynduh ia u lad ka Jylla ka long halor ka jingsahteng ki bill ba la dep mynjur da ka KHADC mynta la bun bun snem.
U la pyntip ruh ba na ki 7 tylli ki bill kiba la dep mynjur da ka KHADC naduh mynshem snem kiba la sah teng kiba kham kongsan tam ki dei ar tylli ki bill kata ka dei ka Khasi Hills Autonomous District Administration of elaka Amendment bill 2023 kane ka bill ka la poi ha rai Bhavan bad ki la ioh ban pynsngew ha u lad namar ka long kaba donkam haduh katta katta bad u lad u la sngewthuh bha kane ka bill ka dei shaphang ban pynkupbor bad ithuh da ka aiñ ia ka jingtrei kam jong ki seng samla bad ki seng kynthei ne seng longkmie hapoh ki shnong, baroh shi katta ka jingtrei kam jong ki seng samla ki seng longkmie hapoh ki shnong ki dei kiba shu hikai kumto khlem don kano kano ka jingithuh da ki aiñ. Na ka liang u lad u la ong ba un sa leh noh kham kloi namar ka long kaba konsan.
Ka bill ba ar ka dei Khasi Hills Autonomous District Khasi Social Custom of Lineage Amendment 2023 kane ka bill la pynsngew sha u Governor ba ka long kaba kongsan namar ka dei shaphang ka jinglong jingman ka riti ka dustur jong ki Khasi khamtam ia ki Khasi ba ngi don ia ka kur ka jait jong ngi. Lah ban ong ba katkum ka jingwad jingtip ki don kumba 3000 tam ki kur ki jait ha ka jaitbynriew khasi jong ngi, la ngi ong ki kur Syiem ne ki kur Lyngdoh ne ki kur nongrum ne kino kino ki kur kim shym pat la ithuh da ka aiñ ta ka daw ka long kaba kongsan bad ba donkam haduh katta katta. Kane ka dei ka Amendment hapoh ka khasi Social Custom Lineage Act ka dei ka Principle Act 2007 bad ia kane ngi wanrah ha ka Amendment Act 2023 ban ioh ban ithuh noh ban Register noh kyrpang ia ki kur ki jait jong ki khasi jong ngi, khnang ba ka jingtrei ha ki kur kan long kaba ryntih.
Shuh shuh u la pynpaw sa kawei ka bill ba khamkongsan dei ka khasi Hills Autonomous Regulation of Administration of Land Rule 2023, ngi la ioh ia ka Land Act 2021 bad ngi donkam ia Kane ka Act ngi donkam ban pynjanai shuh shuh khnang ba ki paidbah khasi jong ngi kiba don ia ki khyndew ki shyiap ne ki jaka shimet ne jaka jong ki kur ki lah ban Register ha kine ki Act, ka don ruh ka khasi Hills Autonomous Fishery Amendment bill 2023, khasi Hills Trading by non Tribal Amendment Rule 2023, khasi Hills Autonomous District & Nomination Election jong ki Lyngdoh raid ki Myntri ki Sordar Administration of Sohiong bill 2023 bad sa kawei ka bill ka Regulation of Administration Land Amendment bill 2024.
Kine baroh hynñiew tylli ki bill ki dei ki ba donkam bha, hynrei na ka liang ka khasi Hills Autonomous District Council ki la pynsngew ba artylli ne lai tylli ki bill ki dei kiba kham kongsan ban pyntreikam noh kham kloi namar ki dei kiba pyndonkam man ka sngi ha ka jaidbynriew jong ngi ki khasi.
Na ka liang u Governor u pynpaw ba ki long kiba kongsan bad yn sa shim khia ia kine ki bill kiba la pynpaw da ka KHADC ban pyntreikam noh khamkloi.
