Mynta ka sngi ka seng MPUF East Jaintia hapoh ka jingialam jong u President ka seng u ma Kyrshan Blah ryngkat u Secretary jong Wapung Unit u samla Kynmoo Phawa, u President ka sanshnong u Samla Jonny Phawa bad ki dkhot jong ka seng kila leit ban ia kynduh ia u DTO ka East Jaintia Hills District ban tip ia ka daw jong ka jingbymdon jong ki Motor Vehicle Inspector (MVI) ha katei ka ophis kaba la kynjoh sha ka 5-6 bnai mynta.
Haba ka seng kala iohlad ban ia kren bad u DTO halor ka jingbymdon ki MVI ha kane ka ophis, na ka liang jong u, u la ong ba u la dep ban phah teng da ka jingthoh sha ki bor ba halor ha ba iadei bad kane ka jingbymdon MVI hapoh katei ka ophis jong u, hynrei haduh mynta na ka liang ki bor ba dei peit kim pat phah briew ban trei ia katei ka kam. Ka jingbymdon jong ki MVI kala pyndkhot shibun ia ka jingtreikam jong katei ka ophis ha kaba iadei bad ki paidbah kiba iadei kam bad ki kali motor hapoh ka District East Jaintia Hills la ong ka seng.
Kumta na ka liang jong ka seng ka la kyrpad jur ia u Commissioner jong ka Transport ka sorkar jylla ba un sngewbha ban shimkhia halor kane kam. Ka seng kala ong ruh kan ym shong kli kti bad shen kan sa leit buh da ka jingthoh ha ophis treikam jong u Transport commissioner lada ka kam ka dang slem.
Kane ka long katkum ka kyrwoh khubor ba la pyllait da u President jong ka seng MPUF East Jaintia u ma Kyrshan Blah.