Mynta ka sngi na ka liang ki nongialam bad ki dkhot jong ka Balang U Blei ha ka shnong Wahiajer jong ka East Jaintia Hills District, da kawei ka jingmut ki la mih paidbah ban leit pan jingshai halor ka jingkren kop bad kren sarong uwei na ki heh nongtrei jong ka karkhana pynmih dewbilat kaba la tip kum ka Meghalaya Cement Limited (MCL) Topcem, kaba u la kren ba dei kane ka karkhna ba tei ia ka ïing mane jong ka Balang U Blei ha Wahiajer, kaba u la kren ha ka sngi 24 tarik mynta u bnai ha ka jinghuri hura kaba la mih ha ka jingthmu ban pynlong ia ka Public Hearing ha katei ka karkhna na ka bynta ban pynheh shuh shuh ia ka jingpynmih dew bilat ka jong ka.
Ha kane ka sngi na ka liang ki nongialam ka Balang U Blei Wahiajer la lam khmat da u Samuel Sutnga Secretary, ma Sunday Suting Rangbah ha ka Balang ryngkat ki longkmie longkpa jong ka Balang ki la iakynduh ia ki heh katei ka Company na ka bynta ban pan ia ka jingshai halor katei ka jingkren kaba khlem nongrim.
Ha ka jingiadei bad kane na ka liang u ma Phon Syih uba dei u Local Director jong Topcem ha ka jingiadonlang kiwei de ki heh company, ki la pynshai shai sha ki dkhot ka Balang da kaba ong ba don ka jingkren kum kata hynrei uto uba kren u khlem mut satia ia ka iing mane jong ka Balang U Blei ha Wahiajer hynrei, une uba kren u la thew ia kawei ka ïing mane kaba kane ka karkhana ka la tei kaba don ha u pud u sam jong kane hi ka karkhana.
Kumta hadien ka jingiakren mynta ka sngi hapdeng kine ki ar liang ka la poi sha ka jingiasngewthuh jingmut bad na ka liang ki dkhot ka Balang ki la ong ruh ba kim kwah shuh ban mih kum kine ki ktien kiba ym don nongrim ei ei ruh khamtam ha ka jingiadei bad ka kam Balang.
