Mynta ka sngi ki paid nongshong shnong ka Lapangap ryngkat ki sengbhalang bapher bapher ki la ia mih paidbah ban leit phut ia ki tynrai dieng ba la thung beaiñ da ki paid karbi hapoh u pud u sam jong ka shnong Lapangap.
Ha kane ka sngi ki paidbah ki la khie bitar ia ki jingleh bymsuidñiew jong ki paid Karbi, kiba la wan kyntur pud jubor wad shaduh ki bynta jong ka shnong.
Ki paid karbi ym tang ba ki la thung ia ki tynrai dieng hynrei ki la shna ruh ia ki ïing jong ki hapoh utei u pud u sam.
Na ka liang ki sengbhalang ba kynthup ia ka JSU, ki la khot la wer ia ki paid nongshong shnong jong ka thaiñ khappud ban long kiba ia tylli khnang ba kin lah ban ialeh pyrshah ia ki jingthmu jong ki paid karbi ban klun jubor ia ki jaka ki puta.
Ha kane ka sngi nalor jong u paidbah ba bun la pyndonkam ruh da ki JCB ban pynjot pynpra ia ki tynrai dieng bad ia ki ïing jong ki paid Karbi.
