-Kular u MR ban pynïoh tulop ïa ki nongtrei JHADC shwa ka lehniam Behdeiñkhlam ka SRJ-
Ka District Executive Committee (DEC) jong ka National People’s Party (NPP) West Jaiñtia Hills mynta ka sngi 6 tarik u Jylliew kala leit ban ïakynduh ïa u Myntri Rangbah ka Jylla u Conrad K. Sangma, halor ki kam ba dabg sahteng hapoh ka West Jaiñtia Hills District.
Kine ki mat ki kynthup naduh ka ka jingpyntrei ïa ka Iawmusiang Market Complex kaba la sahteng da ki phew phew snem, kaba ar ban pyllait noh ïa ka tulop ki nongtrei ka JHADC bad ka bhah pisa jong ka Council ka ban pynsuk ïa ka Council ha ka ban siew tulop manla u bnai ïa ki nongtrei jong ka.
Ha kane ka jingleit kynduh ka Committee ïa u Myntri Rangbah la lamkhmat da u MLA ka 2- Jowai ma Wailadmiki Shylla, ha ka jingïadon ryngkat u CEM ka JHADC ma Thombor Shiwat, u President District ma Octo Mewot Lamin lem bad ki nongtreikam jong ka Party NPP.
Ha kane ka jingleit kynduh ki dkhot ka Committee kila ïoh lad ban ïatai jingmut sani bha halor kitei ki kam kiba hakhmat eh na ka bynta ka jingmyntoi ki paidbah nongshong shnong ka West Jaiñtia Hills.
Ha kaba ïadei bad ka Iawmusiang Market Complex na ka liang u Myntri Rangbah ula kular ban Sanction pisa noh ïa katei ka Market Complex Iawmusiang hapoh kine ki khyndiat sngi ban wan.
Ha kaba ïadei pat bad ki kam ka JHADC, kumba long mynta ki nongtrei kaCouncil ki shem jingeh haduh katta katta halor ka jingduh tulop kaba da ki phew phew bnai bad ka lah ruh ban kot sha ka shisnem duna, halor kane ki dkhot ka Committee NPP kila kyntu na u Myntri Rangbah ban pynbeit kloi noh ïa kane ka jingeh jong ka Council.
Ha ka jingïakren mynta ka sngi u Myntri Rangbah ka jylla ula kular ban pyllait noh ïaka tulop jong ka Council hashwa ka lehñiam Behdeiñkhlam mynta u snem, khnang ba ki nongtrei ka Council kin ïoh ban pyndap pynbiang ïa ki jingdonkam ha kiba bun ki liang.
Halor kane da ka jingïohi jngai ka Committee bad ka jingïamir jingmut sani bha kala sngewbit ban wanrah ïa kane ka mat rukom pyntreikam kaba ki khot haka ktien nongwei (Financial Reform) kaba mut halor kumno ban pynbit pynbiang ïa ka rukom pynpoi beit beit ïa ka pisa sha ka Council, khlem da ïaid shuh lyngba ki tnad (Department) bapher bapher.
Na ka por sha ka por ka jingbymbiang ka rukom ïoh tulop ki nongtrei ka Council ka dei na ka daw ba ka jingbun palat ki tnad sorkar kiba hap ban ïaid lyngba haduh ban da poi ka pisa sha ka Council bad kane kala wanrah ha ka jingdkoh ka rukom pynpoi pisa na ka bhah jong ka Council (share).