Ka Kiang Nangbah Government College Student’s Union (KNGCSU) Jowai hynnin sngi 27 tarik u Lber hapoh ka jingïalam jong u President samla Evermore Rymbai lem bad ki samla pule kila leit ban kynduh ïa u Symbud Myntri Rangbah ka jylla u ma Sniawbhalang Dhar ha Highwind Lakeside kaba don hajan ka pung Thadlaskeiñ.
Kane ka jingleit kynduh jong kitei ki samla pula ka KNGC ka long halor ka nongrim ban pynkynmaw biang ïa ki mad jingdawa kiba ka seng kala dep ban pynsngew sha ka sorkar bad na ka liang u symbud myntri Rangbah ula kloi ban pdiang ïa kane ka jingdawa kiba ka College ka donkam eh bad ula kular ban pyntreikam ïa ki katba lah.
U samla Evermore Rymbai haba ïakren bad u nongthoh khubor ula ong kane ka jingaiti ïaka Memorandum mynta ka sngi ka long tang kum ka jingpynkymmaw ïa ki mad jingdawa ha Symbud Myntri, kiba ka Union kala dep ban pynsngew naduh ka 2 tarik u Lber 2024.
Kitei ki mad jingdawa kiba ka KNGCSU ka buh hakhmat eh ki long kaba nyngkong ban dawa buh ïaki Security Guard haki Hostel jong ka College, kaba ar ban don ïaki jaiñ ‘Personalized Graduation gowns’ kiba pyndonkam haka por lehkmen kum ki samla kiba la pass naka College namar bunsien ki samla pule ki hap ban siew da ka pisa bad kane kam sngew ïahap satia ïa ki nongïalam ka Union.
Kaba lai ka Union kala dawa ban don ïa ki nonghikai (Lecturer) haka Subject Khasi, kiba haduh mynta ka College kam shem don ki nonghikai Khasi bad kane kaba la buh jingeh ïaki samla pule khamtam ïa kito ki samla pule kiba shim ïaka major haka Subject Khasi.
Ka saw la dawa ban don ïa ki kot ki sla kiba katkum ka juk ba mynta hapoh ka Library jong ka College, naduh ki por mynshwa haduh mynta ki kot hapoh Library ki dei ki juh beit khlem don jingkylla la ong utei u President, da kaba u ong wat na ka liang ka tnad pule puthi kala pyntreikam ïa ka New Education Policy (NEP).
Kaba san la dawa ban pynheh (Up gradation) ïa ka Boys Hostel jong ki shynrang kaba pdiang tang kumba 25 ngut ki samla pule shynrang. Kumba long mynta ki samla pule jong ka College ki don haduh 3,618 ngut bad ki shynrang ki don mar shiteng bad kane kala dawa eh ïa kito ki samla shynrang kiba wan pule na ki shnong kiba jngai.
U samla Rymbai ula ong hadien ka jingïakren bad u Symbud Myntri Rangbah ula pynsngew ba ïa kine ki kam kiba ka College ka dawa kila ïaid shakhmat mynta bad ka sorkar ka dang ap ban kut shwa ka Election MP 2024. Kum ka Union ka ngeitskem ba kine ki kam kin treikam noh mardor da kaba u ai khublei kyrpang ïa u MLA ma Sniawbhalang Dhar.
Shuh shuh ula ong kum u President haka jingïalam lynti ïa ka Union kila pyrshang ban wanrah ïa ki kam pynroi hapoh ka College bad mynta ka kynti ka College kala ïoh ïa ki jaka ïaid kjat (footpath) ha ki bynta ka College bad ka jingpyni tynnad ïa ka phyllaw jong ka College ha kaba ka kam ka dang ïaid shakhmat haka jingtrei bad mynta sa ka jingai rong ïa ka College yn sa leh noh da ka jingkular lang jong u MLA ka Jowai.