Mynta ka sngi ka kynhun jong ka Khoid Ya Ka Wah Myntdu (KYKWM) hapoh ka jinglam khmat jong u President u ma Khroo L. Pariat, u ma Oriland Shylla bad ki dkhot ka seng kila leit ban ia kynduh ia ki katto katne ki nongsait jaiñ ha ki bynta jong ka Wah Myntdu na ka bynta ban ai ka jingiasyllok bad pynsngewthuh halor ki jingma kiba lah ban mih lada pynjakhlia ia ka wah Myntdu.
Ha kane ka sngi ki nongialam ka seng kila iohlad ban leit sha ki bynta don bha ki nongsait jaiñ kum ha Jingkieng Pamblah, Chahtngit, dam Chkaa Jwai, Mublai Syntu Ksiar bad ha kiwei de ki jaka.
Na ka liang u President ka seng u ma Khroo ula buh ka jingkyrpat ia baroh kiba ju mlien ban sait jaiñ ha Wah Myntdu ba ki dei ban leh khuid da kaba kin pynkhuid ia baroh ki jakhlia kiba kila bret sha wah kum ki plastic, ki dipar, ki sabon bad kiwei de ki jait jakhlia. La khang ruh ia kitei ki nongsait jaiñ ba naduh ka 1 tarik u Lber lada dang lap ia kiba ialeh pyrshah kin shah pynshitom katkum ki kyndon jong ka NGT. Ha ka juh ka por ka seng ka dang wad ki lad ki lynti na ka bynta kito kiba ju im sngi da kaba sait jaiñ ha ka wah Myntdu.
Kiwei de kiba ai jingkren ha kane ka sngi ki kynthup ia u ma Snarmon Lato, Oriland Shylla bad Hunbeitki Dkhar kiba la pynpaw ba ka long kaba donkam haduh katta katta ban sumar bad ban pynkhuid bha ia ka Wah Myntdu namar ka dei tang kane ka wah kaba pynioh umbam umdih bad bsa ia ki nongshong shnong ka nongbah Jowai bad ki shnong ba marjan jong ka.