Ka KSU Lumshnong Unit hadien ba ka la ïoh ïa ka jingujor na kiba ha ïing jong kawei ka longkmie bym kwah ban pynpaw kyrteng kaba dei na ka shnong Chiehruphi, halor ka jingleh bymsuidñiew ïa ka ha ka por ba ka wan ban kha khunlung ha poh Lumshnong PHC, kumta ka seng mynta ka sngi kala leit hiar dalade ban tohkit halor kane ka jingjia.
Na ka liang ka seng kala pynpaw ba katkum ka jingujor bala ïoh, la ïathuh ba ha ka miet 21/05/2023 kumba 10 baje eiei kaba dei ka miet Sunday katei ka longkmie namar ba la dei ka por kha ïa i khun ka la leit ha katei ka Hospital sorkar. Hadien ba ki nurse ki la dep ban peit ki la ïathuh ba ka por ban kha kan dei 2 baje shiteng synñia bad ki la ïathuh ruh ba itei i khyllung idei iba la ïap lypa hapoh kpoh bad mar kumta hi kitei ki nurse hadien ba ki la dep batai kumtei ki la leit thiah noh sha jaka ba ki sah. Hynrei ha ka por 12 baje shiteng synñia itei i longkmie i la suh khun bad kiba ha ïing kiba ïa donlang ki la phone sha ki nurse ban wan kloi, hynrei kitei ki nurse kim treh wan ki shu batai ha ka phone ban leh kumne kumtai bad ai da ka um ban dih.
Namar bajia ryngkhat ba la ap miet lang ïa itei i longkmie da iwei i riew tymmen ba juh donsap ban pynkha khun iba dei ba ha ïng ha sem im banse ban pynkha hi namar bym lah ap kat ban da poi kitei ki nurse. Ynda la dap 2 baje thik kitei ki nurse ki la poi bad lap ba la dep pynkha ïa itei I khunlung bala dep khlad lypa. Hangta kitei ki nurse ki la ong, ‘Oh lah dep pynkha mo’, bad ki leit phai biang sha jaka sah bad thiah. Na ka liang ka seng ka sngewphylla ba ki nurse kiba don duty kumno pat ki leit thiah aram kata ruh sha jaka sah ym ha nursing room. Ha ka jingshisha ki la dei ban don ha nursing room haba don ki emergency case kum kitei. Kane ka jingleh kitei ki nurse ha katei ka miet tharai lada ym don itei meirad iba tip ban pynkha khun ym tip shuh ioh wat ia itei i longkmie ruh in poi sha ka jingjia ba sngewsih.
Lyngba kane ka kyrwoh ka Seng ka kyntu ïa kitei ki nurse ba kim dei ban leh sting haba don kum kitei ki case, lada nangiai jia kumne shakhmat ka seng kan sa leh ïa kaba donkam. Ha katei ka jingleit jurip jong ka seng, la lap ruh ba duna bha ki staff nurse bad don ruh tang uwei u Doctor. Utei doctor ha katei ka miet ba jia um don u leit shnong. Haba ka seng ka kylli, u Doctor u la iathuh ma u lei u la dei ka por ban leit pyntbit (traning), hynrei um ïoh ban mih namar bymdon nongïarap kylliang ïa u. Kumta ka Seng ka dawa na ka sorkar ban pynbiang nurse bad Doctor mar mar ha katei ka Hospital khnang ba kan ym ktah ïa ki nongpang ba wan thiah ha kane ka Hospital.