Kawei na ki kynhun treimon sngewbha kaba dang mih thymmai ïa kaba la tip kum ka Pnar Student’s Movement (PSM) mynta ka sngi Balang kala leit ïakynduh ïa u Deputy Commissioner ka West Jaiñtia Hills District, halor ka jingpynhap ka District Malaria Officer (DMO) ïa ki shnong Pnar shapoh ka West Karbi Anglong Assam.
Halor kane ka Pnar Students’ Movement hadien bala ïoh jingtip ba ka ophis District Malaria Officer kala pynhah ïa kine ki shnong Pnar kum ka Deinler, Laher, Moorap Muriap, Mulaber kat kum ka shithi ba phah sha ka DHS da ka District Malaria Officer. Mynta hi ka sngi ka seng kala leit ban kynduh shwa ïa ka DMO bad na ka liang ka DMO kala kubur ba ki don ki jingbakla bad kala ong ba ka la dep ban pyntip sha DHS ban weng ïa kane ka shithi ban phah sha Assam.
Shuh shuh ka la kular ban ai ïa ka jingpynshai halor kane ka shithi ba la dep phah bad ruh ka la ong ba ka kubur ban weng ïa kane ka shithi ba la phah ma ka sha DHS Shillong kumba ladawa ka seng. Na ka liang ka seng ka la leit ïa kynduh ïa u DC Jowai mynta ka sngi bad na ka liang u DC ruh u la kular ban shim khia ïa kane ka shithi ba phah da ka DMO bad ruh ula ong ba kine ki shnong ba la thoh ha ka shithi ki hap hapoh u pud u sam ka jylla Meghalaya bad ula ong ruh ba un sa pan ka jingpynshai na ka DMO halor ka shithi ba ka phah sha DHS ba pynhap ïakine ki shnong Pnar sha Assam.
Ka seng ka la dawa na ki bor ba dei khmih ban weng ïa ka shithi ba phah da ka DMO ba pynhap ïa kitei ki shnong Pnar sha Assam bad lada ki bor ba dei khmih kim leh ei ei, ka seng kan shim da kawei pat ka lynti, pynkut ka kyrwoh na u President ma Embhah Passah bad u General Secretary ma L. Suiam.