Ki nongshong shnong jong ki 36 tylli ki shnong kiba don hapoh Block-I ki pynpaw ba long katba long ruh ki kwah beit ba ki shnong ki thaw jong ki kidei ban hap beit shapoh u pud u sam jong ka jylla Meghalaya, namar ba kim don ka jinghun mynsiem ban shah pynhap jubor sha ka Assam.
Ia kane ka rai la shim da ki paidbah nongshong shnong jong kitei ki 36 shnong ha ka jingialang kaba la pynlong ha kane ka sngi Saitjaiñ (16.04.2022) ha shnong Mukroh, West Jaiñtia Hills District kaba la khot pynlong da ka Hynñiewtrep Border Disputed Redressal Forum (HBBRF).
Ha kane ka jingïalang paidbah la ioh ia ka jingpynshai paidbah ba ka Elaka-Labang Nongphyllut Pangam Raliang, kala duh noh ïa u Dolloi jong ka tang namar ba la pynhap ïa ka shapoh ka Karbi Anglong District, Assam, kum ki nongshong shnong kiba dei ki Pnar ki la dawa jur na ka Sorkar Jylla ba kane ka jingpynbeit pud ba ar (Phase-II) baroh kitei ki shnong Block-I dei ban pynwan biang (Re-tranfer) ïa ki shapoh ka Meghlaya.
Ïa ka jingïalang ha kane ka sngi la pynïaid da u Bah Aiborlang Shadap uba dei u MDC ka Barato-Mukroh, na ka liang u ma M.M. Thaiang ula kren maitlynti halor ki mat jingjingdawa naduh ki por mynshwa ban pynwan biang ïa kitei ki jaka shapoh Meghalaya da kaba ula pynsngew ba ki don ki kot ki sla bad ki sakhi satar kiba biang ba kitei ki jaka ki dei ki bynta jong ka Meghalaya.
La ïakren ruh halor ka Memorandum of Understanding ba la ïa soi hapdeng u Myntri Rangbah ka Jylla Meghalaya, Conrad K Sangma bad u Myntri Rangbah ka Jylla Assam, Himanta Biswa Sarma ha khmat ka Sorkar India ban pynbeit ïa u pud u sam ha ki 6 tylli ki jaka kata ha ka Phase-I.
Nalor ki nongïalam ka Forum, la ïa donlang da ki kynhun sengbhalang bapher bapher ka Ri-Lum Jaiñtia ba kynthup ïa ka HYC, KSU, JSU, NHP nalor ki seng treimon sngewbha, ki nongïalam shnong, ki nongïalam Elaka, ki nongïalam ka Sur u Paidbah ka Bri U Hynñiewtrep.
La ïadonlang ha kane ka sngi da u Doloi ka Elaka Raliang, ma C. Lyngdoh, u ma A Lipon, Chairman ka Synjuk Waheh Shnong Ri Jaiñtia, u bah C. Sungoh Chairman ka Forum, Secretary ka Labang Nongphyllut Pangam Raliang Council, u bah B.L. Nongum, MLA barim ka Mairang, bah Rastingwel Thabah, u bah Thomas Passah, u bah Erwin K. Syiem Sutnga, nongïasaid aiñ bad kiwei de.
Na ka liang u bah Sutnga ula pynsngew ba la dei ka por ban pynkhreh noh ïa kane jingïakhun shaduh ka ïingbishar ba don burom jong ka Supreme Court namar ka sorkar kala pynkheiñ ïa ka nongrim jong ka Six Schedule jong ka Council.
Ha ka juh ka por u kyntu ïa kitei nongshong shnong khappud ‘na ka bynta ka jaitbynriew dei don ka jingkitkhlieh halade bad ka jingïatylli lang kawei ban ïakhun ïa kane haduh ban da jop’ da kaba pynsngew ruh ba ka jaitbynriew Khasi Pnar ka don tang kumba 16 lak eiei. Ula kynthoh jur ïa kane ka sorkar MDA ba mynta kaba la leh jubor ïa kane ka jingïasoi memorandum of understanding (MoU) khlem ka jingtip jong kiba bun ki nongshong shnong ha ki jaka khappud bad kane ka jingsoi (MoU) hapdeng ki ar myntri rangbah (Meghalaya-Assam) ka la long kum kata ka ‘Mait’, ‘Ot’, pynsah ‘Umdum’ ïa u paidbah ong u ma Sutnga.
