Ka Deputy Commissioner, East Khasi Hills District ka Kong RM Kurbah ha ka 3 tarik Kyllalyngkot 2025 ka la lum ia ka jingialang ia ki kynhun bapher bapher ban iakren haba iadei bad ka krem Mawjymbuin .
Ha kane ka jingialang la wan ban don ryngkat da ki Nongialam Shnong jong ka Mawsynram, ki kynhun niam hindu na Assam, ki heh Pulit, ki Ophisar Sorkar. Haba kren sha ki lad pathai khubor na ka liang u Rangbah Shnong Mawsynram Hiamdor Rapsang u la ong, “Ngi la ioh shithi na ka liang ka shnong ban wan sha kane ka jingialang ha la khot da i Deputy Commissioner ha ka ba nyngkong ngi la iohi ha ka jingpynbna ba i khot lang ia ka kynhun niam na Assam ban ia don lang ha kane ka jingialang.
Ha kaba nyngkong ngim kwah ba ka kynhun na bar kan wan mushlia ia ki kam ïing jong ngi hangne ngi la thmu ban shu wan mih hynrei hadien ba la iakren bad i Deputy Commissioner, na ka liang i Deputy Commissioner i la kyrpad ban nym poi sha kata ban pynbyrngia ia ki ngi shu kwah ban sngap kaei kaba i DC i don ban ong ha kane ka jingialang bad ngi mynta”.
Shuh shuh u la ong “ha ka jingiakren ha ka jingialang u la ong na ka liang ka Dorbar shnong Mawsynram ngin ym kynran dien wat tang khyndiat ruh ia ka nongrim jong ngi kaba la ju ïeng baroh shi kata kaba nyngkong ba ngi dei kita ki trai jong ka krem Mawjymbuin haba ong ki trai ngi lah ban rai kano kano ka rai ba ngi shim hangtei ha jaka lajong. Kaba ar katei ka krem Mawjymbuin ka dei beit ka jaka jngohkai bad ngim pynbyrngia iano iano ban ong ban wan mane blei ha katei ka jaka kata ka dei ka nongrim jong ngi naduh kaba sdang. Ki Nongjngohkai pyrthei ki lah ban wan na kylleng ka ri india baroh kawei ban wan ha katei ka jaka tangba ki ba wan ki dei ban shu bud beit tang ia ki kyndon ba ka shnong ka buh kam don kano kano ka jingkhang ia kino kino ki jingngeit niam ki Hindu, Muslim, Christian kam don kum kata wan kum ki nongjngohkai bad shu bud beit ia ki kyndon kaba ka shnong ka la buh mar sien rung ha ka krem Mawjymbuin phin iohi ia kita baroh khoit.
Kaei kaba mih ha ka jingkren ka long ba u une u Seng na Assam yn da pyni ha ka jingialang ka dei beit kaei kaei kaba u la shah ialam bakla ba ong ba ka don ka jingkhang ban wan ha krem Mawjymbuin, na ka liang ka shnong ka iathuh ba ka krem Mawjymbuin ka plie beit 365 sngi kam don kano kano ka jingkhang ia katei ka jaka ban wan tangba ngim shah ban pynlong ia jaka lehniam, lada phi wan phi shu dem mano ban khang ia kata, ka kynhun niam na Asaam ka wanrah da ka MoU jong ka Seng khasi Mawsynram bad u ioh coy naei ruh ym tip bad u la pyni ha ka jingialang bad la pynshai ia u ba la shah ialam bakla bad ka Seng Khasi Mawsynram kam dei kaei kaei hynrei ka shu mih kum kita ki Seng ban pun lynti ban kamai tang ban ioh jingmyntoi shimet kim kheiñ shuh ia ka ïap ka im jong ka Jaitbynriew, kim kheiñ shuh ia kata ka hok longtrai jong ngi”. Na ka liang i DC i la pyni ia ki kyndon bad ki jingthoh ba ioh na ka Seng Khasi kmie na Mawkhar ba kim ithuh ia kata ka Seng Khasi Hima Mawsynram.
Shwa ban pynkut na ka liang ka Shnong Mawsynram “ynda la iakren bun ia kiei kiei ha ka jingialang na ka liang jong ki kynhun niam na Asaam ki la shai ba ki shah ialam bakla bad na ka liang ka shnong ka la ong da kwah leit sha krem Mawjymbuin leit mynta ne lashai tangba tang kawei bud beit ia ki kyndon jong ka Shnong kaba ka buh tang kata.”
