Ka Deputy Commissioner, East Khasi Hill ka kong Rosetta Mary Kurbah, IAS, ka la khot ia ka jingialang ia ki nongialam ka KSU Laban Circle, Superintendent of Police, East Khasi Hills, Deputy Commissioner of Labour, u Secretary jong ka Khasi Hills Autonomous District Council, ki nongmihkhmat jong ka Mahadev Khola, bad ka Dorbar Shnong Lawsohtun ban iatai sani bha halor kane ka jingiakhih kaba dang iaid shakhmat.
Haba kren sha ki lad pathai khubor hadien ba la wai ka jingialang, u nongialam ka KSU u Reuben Najiar u la ong ba la iakren bniah ia kane ka kam. U la pynpaw ia ka jinglyngngoh halor ka jingong jong ka tnad khlaw ba ka jaka kaba la kdew kam hap hapoh ka jingpeit jong ka.
Nalor kata u la pyntip shuh shuh ba katkum ka jingong jong ki Pandit trai shnong, tang kumba 64 ngut ki nongshong shnong ki sah ha katei ka jaka, kiba baroh ki dei ki khun ki ksiew jong ki nongshong shnong Pandit.
Ka jingialang ka la rai ba yn nym shah ban shna thymmai ha katei ka jaka tad haduh ban da pynbeit pura ia katei ka kam. Ka DC ka la pynthikna ruh ba ïa ki rai ba la shim yn phah sha ka sorkar jylla ban leh ïa kaba donkam.
Utei u nongialam ka KSU u la kynnoh shuh shuh ba ka seng ka la ioh jingtip shaphang ki katto katne ki heh sorkar na kiwei pat ki jaidbynriew kiba la noh synniang pisa bad pynsuk ia ka jingshna iing ha katei ka thaiñ. Hynrei u la pynshai ba ka seng kam pat ioh ia ki kot ki sla ban pynshisha ia kine ki jingkynnoh.
U la pynpaw ruh ba ka RTI mynshwa ka la pynthikna ïa ki jingkhang jong ka sorkar ïa kano kano ka jingtei ha Mahadev Khola. Hynrei ha ki jingiakren ba dang shen, ka seng ka lap ba la weng noh ia ka kyntien “Em” ha ka rekod, kaba la pynmih ia ka jingartatien hato kane ka dei ka jingbakla ne ka jingpynkylla kaba thmu da ka tnad khlaw.
