Ka Dorbar ki Waheh Kur Ri Jaiñtia mynta ka sngi saitjaiñ kala khot pynlong ïa ka jingïalang ha ïing Dorbar ka Chilliang Raij Jowai, ha kaba la wan ban ïashim bynta da ki Waheh Kur bapher bapher napoh ka Ri Jaiñtia kynthup ïa ki longkpa bad ki longkmie.
Ïa ka jingïalang la pnïaid da u ma Khroo L Pariat uba dei ruh u President ka Dorbar ki Waheh Kur Ri Jaiñtia. Baroh kiba wan ban ïashim bynta kila pynpaw ïala ki jong ki jingsngew na ka bynta ka bha ka miat jong ki Kur ki Jait hapoh ka Ri-Lum Jaiñtia.
Ha kane ka jingïalang la pynpaw ka jingsngewdiaw halor ka jingbym pyntreikam ka Secretary bad ka EC jong ka JHADC haduh kine ki sngi, halor ki mat jingdawa ban ïada ïaka kur ka jait jong ka jaitbynriew katkum ka aiñ 6th Schedule kaba la dep phah sha JHADC naduh bnai October, 2024.
Ha kane ka jingïalang ka Dorbar kala rai ban kyrpad biang sa shisien ïa u CEM bad ïa ki EM ka JHADC ba kin khot lang ïaka Dorbar ki Waheh Kur Ri Jaiñtia ban thaw ïa ki kyndon aiñ na ka bynta ki Kur, kumba la dep ban ai jingmut sha JHADC, kila kyntu ïa baroh ki Waheh Kur ba kin buddien na ka Secretary JHADC ha kaba ïadei bad ka jingpynrung kyrteng ïa ki Kur.
Kila shim ruh ïa ka rai ban kyrpad ïa u Conrad K Sangma Chief Minister ka Jylla bad ki MLA na Ri-Lum Jaiñtia ban kin ïakren ban pynduh noh ïa ka kyntien ‘Synteng’ bad ïa ki jaitbynriew jong kiwei pat ki jylla ki bym dei na ka thup jong ka Schedule Tribe Order 1950.
Ha kane ka sngi la ïoh ruh ban pynskhem ïa ki nongkitkam ba thymmai Ka Dorbar ki Waheh Kur Ri Jaiñtia da u ma Erwin K Syiem Sutnga kum u Adviser ka seng bad ula ai ruh ki ktien sneng ktien khraw sha baroh.
Ki nongkitkaam na ka bynta u snem 2025-2027 ki long
President – ma Khroo L Pariat
Vice President – ma Pyrkhat Shylla, ma Jesper Bareh
General Secretary – ma G. H Bareh
Asstt Genl Secy – ma Kitlang Lato
Asstt Genl Secy – ma Kmenlang Myrchiang
Asst Genl Secy – ma, Carmel Suchiang
Treasurer – ma Abut N Muksor
Adviser – ma Erwin K Syiem Sutnga
Adviser – ma Shell Sing Langi
Lem bad ki Dkhot Executive 10 ngut, kynthup ïaki President, General Secretary jong ki Seiñ Kur ha Ri Jaiñtia.
