Ka Dreams Mission jong ka Sorkar Jylla ha ka 20 tarik Lber 2025 ka la pynlong ia ka jingialang sacia ki Seng Samla Shnong halor ka thma pyrshah Droks .
Ha kane ka sngi ba pynlong ia ka jingialang la wan ban ia don bynta da ki Seng Samla shnong bapher bapher, u Mission Director jong ka Sorkar Jylla, bad kumjuh ki nongpyniaid jong ka Rehabilitation centre.
Ha kane ka sngi na ka liang ka Seng Samla Mawlai Pyllun lyngba u President U Bah Samuel Biam u la ong ka jingeh ha ka imlang ka sahlang ka dei haba ki khun samla naduh ki hep kiba rit rta naduh 11, 12, 13 haduh 14 ter ter ki ngop ha ka jingdih ia u droks. U la ong lada ngop ha u droks la long teh mraw bad ka la long kyrni bad ialam bakla ia ka jingim bad ka jingngop ki samla ha u droks ka dei ka jingshah hiar thma ia ka jaitbynriew. Kumta na ka liang ka Seng Samla Mawlai Pyllun ka kyntu ia kiwei ki Seng Samla ban mih shakhmat ban iatreilang na ka bynta ban tehlakam ia u Droks ha ka Jylla.
Shuh shuh u la bynrap na ka liang ka Seng Samla Mawlai Pyllun ka ai jingmut sha ka sorkar lyngba ka DREAMS ban buh noh da ka Rehabilitation centre ha jaka jong ka CRPF Camp ha Mawlai ban buh ia ka Rehabilitation kaba duna dor, namar na ki ba bun ki longïing kiba ngop ha u droks ki wan na ka longïing kaba duna ka ioh ka kot . U la ong ki kmie ki kpa jong kito ki khynnah kiba ngop ha u droks kim don lad ban buh ha ki jaka private Rehabilitation namar ba rem palat ka dor. Shuh shuh u la ong “Kum ki kmie ki kpa, ki Samla jong ka shnong ngim dei ban shim ia kine ki khynnah samla kiba ngop ha droks ban isih noh ia ki ha ka imlang ka sahlang kata ka bym dei, katba lah ngin wanrah ka jingkylla ha ka imlang ka sahlang, kum kine ki donkam ban ioh ia ka jingieid, jingithuh bad ka jingkhring lang ia ki sha imlang sahlang”.
Na ka liang u Director jong ka Dream Mission u Bah Francis Kharshiing u la ong watla ka jingialang mynta ka sngi bad ki Seng Samla ki poi duna namar ka jingbeh jong ki sha ki kam ki jam hynrei kum ki Seng Samla ki sngewkhia bad kloi ban iatreilang ban tehlakam ia u droks. U la ong ba na ka liang ka sorkar kan sa pynlong biang ia ka jingialang ha ki por shuti bad ha ki por ba lait lut baroh na ka bynta ban iathir ban ai jingmut ban rat dyngkhong ia u droks ha ka Jylla. U la ong baroh ki Seng Samla ki sngewkhia namar ym don kawei ka shnong ba lait na une u jingdih (u droks) uba ktah ia ka imlang ka sahlang.
Shuh shuh u la ong kane ka jingialang ka long kaba seisoh hadien ka jingwan ai training ha ki rehabilitation centre bapher bapher bad ki khynnah ki la kwah ia ka jingkylla ban shah hikai ha ki traning bapher bapher ban ieng ha ka ki kjat lajong bad u la ai jingmut ia ki shnong bapher bapher ban thoh sha ka sorkar ban buh ki community hall khnang ban ioh ai training ia ki khynnah samla ban kin ioh jinghikai bapher bapher khnang ban lait na kino kino ki kam sniew.