U MLA ka Jowai Constituency u ma Wailadmiki Shylla uba dei ruh u Myntri ba peit ïa ka tnad ka koit ka khiah, ka Sports & Youth Affairs bad ka tnad Home (Passport) mynta ka sngi ula lum ïa ka jingïalang naduh ki nongshong ïew bala wan mihkhmat ki nongïalam ka Jaiñtia Tribal Trades Association (JTTA), u MDC ba dei peit ïa ka tnad ïew ma Seiborlang Shadap, ki ophisar na ka tnad JHADC bad PWD.
Kumba long mynta ka jingpyntrei thymmai ïa ka ‘Iawmusiang Market Complex’ lyngba ka projek bala tip kum ka (Re-Development of Iawmusiang Market Jowai), kaba la sdang ban shna thymmai naduh u bnai Nohprah 2024 la sakhi ïa ka jingïaid shait shait ka kam kaba la poi sha ka 70%. U ma Wailadmiki haka jingïakren bad ki lad pathai khubor, ula ong kum u MLA u kwah ban don ka jingïasyllok lang ban pynbeit ïa kine ki jingeh naduh ki nongshimti ïa kane ka ïew kiba long ki nongshong die jingdie.
Kumba long mynta ka jingshna ïa ka ïew kala jan dep bad kala don ka jingeh kaba mih mynta na ki nongshong ïew ka long ka jingduna ki dukan hapoh kane ka Complex katkum ka plan ka ka jingdon ki dukan ka long tang 320 tylli, katba ka jingdon ki nongshong ïew katkum ki Permit kiba la shah pynkynriah shipor sha ïawthymme kidon haduh 600 tam eiei.
Na ka liang u MLA ula ong lyngba kane ka jingïakynduh lang yn salah ban pynbeit noh ïa kine ki jingeh baroh da kaba wad ïa ki lad ki lynti kiba donkam, khnang ban lait na kano kano ki huri hura hadien habud. Ki nongïalam ka JaiñtiaTribal Trades Association (JTTA) naduh u President ma I. Najiar bad ki dkhot kila pynsngew ïa ka jingdonkam la kumno kumno dei ban pynïoh dukan beit ïa baroh kitei ki 600 tam ki nongshong ïew kiba don permit bad la dawa ruh ban pynshna lang bad ki jingkhang (shutter) ha manla ki dukan khnang ban pynsuk ïa ki ha ka kit ka bah. Naka liang u MLA ruh u la kular ban pynbeit ïa kine ka jingeh namar kumba longmynta ka jingshna ka dang ïaid katkum ka Plan.
Kum ban shu pynkynmaw ïa kane ka ïew la plie mawnongrim ban shna thymmai da u symbud Myntri Rangbah ka jylla u ma Sniawbhalang Dhar ha ka 13 tarik u Nohprah, 2024 haka jinglut kaba 25 klur 60 lak tyngka bad la thmu ban pyndep hapoh 24 bnai bad ïa kane ka kam la pyntrei da u ma Pyrkhat Hinge (Contractor) bad hadien bala dep ban pynshna yn peit bad khmih ïa ka da ka Jaiñtia Hills Autonomous District Council (JHDAC) Jowai.
