U Myntri Rangbah ka Jylla u Conrad K. Sangma hynne ka sngi u la lum ïa ka jingïalang ha secretariat ban ia kren halor ka jingkiew ka jingshah thombor ki kynthei ki khynnah ha ka jylla.
Ha kane ka jingïalang la shim bynta da ki Nongialam Niam, ki kynhun treimon smgewbha, ki Rangbah Shnong bad ki wei ki riew rangbah ha kaba ki la ia kren bad iatai ia ki lad ki lynti ban pynkhlaiñ ïa ki lad jingiada ha ki shnong ki thaw bad ha ka imlang ka Sahlang.
Haba kren bad ki nongthoh khubor hadien ka jingialang u Myntri Rangbah u Conrad k Sangma u la ong ki jingujor halor ki kam sniew ka hiar ha ka jylla, hynrei ka jingjia kaba jia ha kine ki khyndiat taiew ka wanrah ia ka jingtieng ia ki paidbah.
“ka jingjia kum kine ki jingshah thombor ia ki khyllung ki khynnah ka dei ka dawbah ba ngin hap ban ia kren. Ngi thrang bad kular ban shim ki lad ki lynti da ka jingiatreilang bad ki Nongialam shnong, ki kynhun bapher bapher bad ban iatrei ryngkat ryngkat bad ki ban pynduh ia kine ki jingjia.” U la ong.
U Myntri Rangbah u la iathuh ba ki kynhun kiba ia shim bynta ha kane ka jingïalang ki la ai jingmut sha ka sorkar ha bun ki bynta, kum ka jingbuh ia ki counselor ban ai jingmut bad ban kyrshan ia ki khynnah ki samla.
U la bynrap da kaba ong ba ka jingai jinghikai bad ki wei ki lynti kaba ka sorkar kan sa sdang noh shen ban pynsngewthuh ia ki khun samla.
U la iathuh ruh ba ka sorkar kan sa shim ia ka sienjam ban buh ia ki light ha ki shnong ki thaw ban pynkhlaiñ ia ka shongsuk shongsaiñ ha ki por mynmiet.
U la pynpaw ruh ia ka jingsngewkhia halor ka jing saphriang ki jingai jingtip ki bym dei ha ki rynsan Social media, na la liang u Myntri Rangbah u la kyrpad ia ki nongshong shnong ban kiar ban pynsaphriang ia kum kine ki dur ki bym lah ban tikna la ki dei ne em.
U Conrad Sangma u ban jur ia ka jingdonkam ban ia treilang bad ki shnong ki thaw ban iada ia ki kynthei ki khynnah.
U la kyrpad ruh ia ki lad pathai khubor ki ba leh social media ban long kiba don ia ka jingkit khlieh, “ Ha ka jingthrang ban don bun ki ba peit don kiba pynsaphriang ia ki jingtip kiba wan rah ia ka jingbym shong suk shong saiñ. U la kyntu ia ki nongpathai khubor ban wan jingtip bha ha shuwa ban pyllait sha ki paidbah.
U Myntri Rangbah u la iathuh ruh ba ka sorkar kan sa buh da ki CCTV ha kaba ki Nongialam shnong kin peit ia kine. Hapoh ka jingpeit ka Shillong Municipal Board, 47 tylli ki CCTV la dep ban buh ha kaba ha ka wei ka jaka ki don kumba 3 haduh 5 tylli ki camera, 7 tylli ki jaka la dep ban buh bad ki wei ki jaka hapoh kine ki Shi bnai arbnai kin sa lah ban pyndep.
Khatduh u la pyntip ba ia kane ka project yn sa pyntreikam ruh ha Tura, Jowai, bad ha ki wei ki nongbah jong ki District bad sub-divisions. Ki Skul ruh kin hap ban Kynthup lang ha ki por ki ban wan hadien ka jingiakren sani bha.
