![](https://i0.wp.com/yutipnews.com/wp-content/uploads/2024/08/IMG-20240822-WA0015.jpg?resize=640%2C356)
Ka Meghalaya Pradesh Congress Committee (MPCC), hapoh ka jingialam u President u bah Vincent H Pala mynta ka sngi ka la khot da ka jingialang bad baroh ki nongkit kam ka seng na kylleng ki Block bad Constituency na Rilum Khasi Jaiñtia, ban ia kren halor ki sienjam ban pynkhlaiñ ia ka party khamtam ba la jan ka Election MDC na ka bynta ka KHADC bad JHADC.
Haba kren sha ki ladpathai khubor, yn da la dep kane ka jingialang u bah Vincent H Pala u la iathuh ba ha kane ka jingialang la ioh ban iakren halor ka MDC election ka ban sa long shen bad halor ki lad ki lynti ba kan shim ban dang pynkhlaiñ ia ka party.
“Kumba ngi tip ba ka Election MDC na ka bynta ka KHADC bad JHADC ka la jan bad kumta ngi la iakren ban bishar bha ia ki kyrteng jong ki kyrtong ki ba kwah ban iakhun na ka Congress khang ba ka ki nongialam kin ioh ban phah sha ki bor bahalor” u la ong .
U Bah Pala u la ong ruh , “Ngi la iakren halor ka jingshah weng shipor ki 2 ngut ki MLA bad uwei u MLA u khlem shah weng hynrei u la pyniasoh sha ka NPP, ha kaba ngi la pynshai ba ka daw ba AICC ka la weng shwa ia ki ar ngut ki MLA ka longnamar ba ha ka 16 tarik Nailar ha ka jingialang ba la pynlong ki ar ngut ki MLA ki khlem wan kat ba u Dr Celestine Lyngdoh u la wan bad u la ong ba la un leit neem sha ka NPP un sa pyntip sha ka party”.
Na ka liang u bah Pala u la iathuh ruh ba ka party shen kan sa leit ban ujor da ka mokotduma pyrshah ia ka rai jong u Lamphrang ka ïingdorbar ba u pdiang ia ka jingpyniasoh jong ki MLA Congress sha ka NPP.