Ka Meghalaya SSA School Association mynta ka sngi ka 3 tarik Jymmang ka la pynlong ia ka jingialang jong baroh ki nonghikai SSA ha madan Student Jaiaw.
U President ka MSSASA u bah Aristotle C Rymbai u la ong ka jingpynlong ia kane ka jingialang jong baroh ki nonghikai SSA ka dei hadien ba ka kynhun ka la dep shong jingialang bad ka sorkar haba iadei bad ka jingdawa jong ka Association ban pyniasoh lang ia baroh ki nonghikai SSA sha ka tnad pule puthi jong ka sorkar.
U la ong ha kane ka jingialang ka kynhun ka la ia pyrkhat ruh ha kaba iadei bad ka jingioh ia ka NOC namar ka jingkwah jong ka school Managing Commitee ban aiti ia ka jingpyniaid ia ka SSA sha ka tnad pule puthi kaba dei kawei na ki kyndon ba kongsan jong ka sorkar India ba kam dei ban don ka jingiapher hapdeng ka SSA bad ka skul sorkar.
U la ban jur ka SSA bad ka skul sorkar ka dei ban don tang kawei ka jingpyniaid da ka tnad pule puthi jong ka sorkar Meghalaya.
U la ong ba la iakren ia ka jingtyrwa ba la pynkhreh da ka tnad pule puthi ba la phah sha ki da u commissioner bad secretary ka pule puthi hynnin ka sngi kaba iadei bad kawei ka skhim ka ban pyniasoh lang ia baroh ki grant ha ki skul.
“Ka sorkar ka thmu ban wan da ka skhim kaba la tip kum ka Meghalaya Education Grant (MEG), bad ka la ai por ban ai jingmut ia ki nonghikai ha kaba iadei bad kane ka jingtyrwa ha ka 31 tarik u Naitung shwa ba ka sorkar kan wanrah ia ka rai ban iaid shakhmat ha kane ka kam,” u la ong.
Kham mynshwa, ka MSSASA ka la khot ia ka Sorkar Jylla ba kan shimti noh ia ki skul SSA kiba la dep ai jingmynjur. U bah Rymbai u la ban jur ia ka jingdonkam ban shimkhia ia ka sorkar ha ka por kaba biang ban pynhap ia kine ki skul hapoh ka jingpeit beit jong ka tnad pule puthi jong ka sorkar.
Na ka bynta ki skul kiba ki School Managing Committee (SMC) kim nud ban aiti ïa ka jingsynshar, u bah Rymbai u la kyntu ba dei ban ailad ïa ki nonghikai SSA ba kin bteng ban shakri haduh ban da shongthait, da ka tulop kaba ïaryngkat bad ka tulop jong ki nonghikai SSA ba la pyntreikam (regularized).
U la iasaid ruh ban pynjlan ia ka jingmyntoi jong ka Grant-in-Aid (GIA) sha ki nonghikai SSA, da kaba tyrwa ia ka rukom siew tulop kaba kynthup ia ka Basic Pay, ka Dearness Allowance (DA), bad ka jingkiew tulop kaba 3% shisnem.
Nalor kata, u Rymbai u la ai jingmut ban pynkynriah noh ïa ki nonghikai na ki skul kiba duna bha ne bym don nonghikai sha ki jaka pule kiba bun ki khynnah skul.
