U Director ka Tnad Tourism, Bah CVD Diengdoh, ha ka 18 Tarik Risaw 2024, u la lum ia ka jingialang jong ka Committee bad ki nongialam ka All Khasi Meghalaya Tourist Taxi Association (AKMTTA), ka All Shillong Tourist Taxi Driver United Organization, ka Hynniewtrep Tourist Taxi Association, ka Meghalaya Tourist Transport Association bad ka Khasi Hills Tourist Association ban iakren halor ki jingeh ba ki nongñiah kali tourist na ka Jylla kaba ki iakynduh.
Haba kren sha ki lad pathai khubor, na ka liang u CVD Diengdoh, u la iathuh ba hakane ka jingiakynduh bad ki nongialam ki Tourist Taxi Association, ka la don ka jingpynsngew jong ki ia ki jingeh bad kumjuh ia ki jingaijingmut ki ban lah ban weng ia kine ki jingeh.
“La thaw ia ka Committee, khnang ban don ka jingiakren halor ka jingeh kaba ki nongñiah kali tourist ki iakynduh, hakaba ki la ïai pynpaw ruh ia shibun tylli ki jingaijingmut kiba lah ban weng ia ka jingeh jong ki, kumta nga la bthah ia ki ban phah ia ki jingaijingmut jong ki sha ka tnad khnang ban ioh ban pynbeit ia kane ka jingeh, namar ka Tourism ka dei ka tnad kaba bun ki ba nongdon bynta kumta ngin hap ban lum bad ia syllok lang ia baroh ki ba don bynta hakane ka kam” u la ong.
U Bah Ricaldinius Dohling President ka AKMTTA u la iathuh ba haka jingialang, la mynjur ba ki Association kin phah da ka jingthoh ban ai jingmut sha ka tnad na ka bynta ban lah ban pynbeit ia kane ka jingeh jong ki nongñiah kali Tourist.
Na ka liang u Adviser ka AKMTTA, u Bah Kyrmen Uriah u la kdew ba shibun ki mat ba ka Association ka la kdew ha u Director ka tnad Tourism bad kawei na kine ka long ka Reciprocal Transport Agreement (RTA) lane kata ka jingiapynbeit ia ka jingiaid kali katlum ki jingdonkam na ki ar tylli Jylla kumba la leh da ka Sorkar jong ka Sikkim.