U Deputy Chief Executive Member (CEM) u ba dei peit ruh ia ka tnad Elaka hapoh ka Khasi Hills Autonomous District Council (KHADC), Bah Pynshngain N Syiem u la lum ia ki jingialang bad ki Rangbah Shnong kiba hap hapoh ka Sor Shillong bad ki Synjuk ki nongshynshar shong ka Bri u Hynniewtrep, ban iakren halor ki lad ki lynti ban tehlakam halor ka jingjyllei ki nongkhaïi bad nong dih Drok, halor ka jingkhuid jingsuba ha ki shnong ki thaw, ka jingai jingithuh kyrpang ia ki rangbah shnong bad halor ka jingpynkylla ia ka 6th Schedule.
Haba kren sha ki ladpatahi khubor, hadien kane ka jingialang, u Bah Pynshngain N Syiem u la iathuh ba la ioh shibun ki jingai jingmut na ki Rangbah Shnong, khatam ha kaba ia dei bad ki jingeh kiba mih na ka jingjyllei u Drok ha ki shnong ki thaw.
“Ha kane ka jingialang ki nongmihkhmat jong ka Lumsohphoh ki la pynpaw ia ka jingeh namar ba hapoh shnong ki bor shnong ki la ialeh ban tem ia ka jingjyllei u Drok hynrei ki buh jingeh ia ki jaka ba hap hapoh ka Cantonments namar kim ithuh ia ki nongialam shnong bad ka buh jingeh ban tuklar halor ki nongkhaii drug” ong u Bah Pynshngain.
“Ha kane ka jingialang la iakren halor ki sienjam ba ki shnong kin shim ban tehlakam ia ka jingkhaïi Drok ha ki shnong ki thaw da kaba kdew ba na ka liang ka KHADC hi ka la ioh ka jingmynjur ban pyntreilam ia ka Khasi Hills Autonomous District (Administration of Elaka) Amendment Act, kaba kdew shai ban thaw ia ki Vigilance Committee ki ba lah ban iatrei lang bad ki bor ka aiñ ban tem iakano kano ka kam sniew” u la bynrap.
U la iathuh ruh ba halor ka jingkwah ki Rangbah Shnong ban ioh ia ka jingithuh kyrpang khamtam bad ki kam jong ki District Adminstration, ka Council kan sa thoh sha ka Sorkar halor kane ka bynta.
“Kane ka jingkwah ki Rangbah Shnong ka long namar ba teng teng haba don kino kino ki jingjia ba ktah ia ka suk ka saiñ, ki Pulit ki Magistrate kim ithuh ne ñiewkor ia ki Rangbah Shnong, kumta ka donkam ban don da ka jingthoh ba shai khnang ba kan don ka jingiatreilang” u la ong.
Haka ba ia dei bad ka Solid waste Management, na ka liang ka Council kan dang ringdur (draft) ia ki rule, ha kaba na ka liang ka Council kan pyrshang ban pynlong jaka theh ñiut ha man la ki shnong hynrei halor kane kan dang hap hapoh ka jingiakren mynta.