Ki Home Gaurd Volunteers (HGV) na ri Lum Jaiñtia kiba la ju pyndonkam da ka sorkar ha ki por ban iakhun ia ka khlam COVID-19 naduh u snem 2020 kila pynpaw ba ha kane ka kynti kin ym treh ban leit duty Election wat lada ka sorkar ka phah ruh namar ba kim pat ioh lut wat tang ia ka bainongsngi jong ki kaba dang sah haduh mynta khlem pat siew.
Kumta da ka jingiasnohkti lang baroh ki Home Gaurd Volunteers ki la shim ia ka Rai da kawei ka sur ba kim treh shuh ban leit duty election ha u 2023 katba ka sorkar kam pat siew dep ia ka bainongsngi jong ki.
Haba u nonglum khubor ula ioh ban iakren bad ki katto katne ki Volunteer ki la ong ba ka long ka jinglehrain ia ka sorkar MDA kaba haduh mynta la 2 snem ki la iaishah hynrei ka sorkar kam patiaw ia ki. Ha ki jingkhot iakren na ka por sha ka por ka sorkar kala shu pynbeij bad kular kai ban siew hynrei ka long pat da khongpong.
Kine ki Volunteer kila pynpaw ba ka sorkar kam suidniew satia ia ka jingtrei shitom jong ki bad kane imat kim donkam shuh ia ki Home Gaurd Volunteer. Te na kata ka daw kila pynpaw ba katba kim pat ioh ia bainong kaba kila dep trei kin ym shong klikti hynrei kin pynlong ia ki jingiakhih nangne shakhmat, kumba ka sorkar ka kwah ia ki tad haduh ba kin da ioh ia la ka jong ka hok.