Hynnin ka sngi (4.7.2024) u Chief Secretary u D.P Wahlang, IAS u la shim ia ka jingialang (review meeting) bad baroh ki Deputy Commissioner jong ki District ban bishar bniah ia ka jinglong jingman jong ka jingjulor ki surok bad ka jingktah ha ka jingpyniasoh, namar ka jingjur u slap ba la wanrah da ka lyer kitslap ba la tip kum ka South West Monsoon kaba mynta, ka jingsam ia ki jingiarap bad ka jingbuh pisa ha baroh ki District.
Ki heh ophisar kiba la wan sha kane ka jingialang ki kynthup ia u Sanjay Goyal, u IAS, u Commissioner & Secretary, Revenue & Disaster Management Department; u Commissioner bad u Secretary ka PWD, (R&B) u Syed Md. A. Razi, IRTS; ka kong M.War Nongbri, IAS, Secretary bad ED, SDMA, ka tnad Revenue & Disaster Management; ki Deputy Commissioner jong baroh ki District; u Chief Engineer, ka PWD Roads bad kiwei ki heh ka tnad PWD Roads bad Revenue & Disaster Management.
Ka jingialang ka pynpaw ba na ka liang ka sorkar jylla ka dang buddien ia ka jinglong jingman namar ba u slap (monsoon) u la pynjulor ia kiba bun ki jingtei, la wanrah ia ki jingtwa khyndew, ki jingjia ba ki dieng ki hap, ki jingshlei um bad kumjuh ruh kiwei kiwei ki jingjulor ha kylleng ki District. Ka jinghap slap naduh ka 1 tarik Jylliew, 2024 haduh ka 3 tarik Naitung 2024 ka long kaba palat na ka bynta ka jylla kaba la tam 44% na kaba ju long, ka jinghap slap ba la lum lang ka long 1173.2 mm bad ka la saphriang kylleng ka jylla bad ka jingktah kaba kham jur ia ki Distrik ba Shathie jong ka jylla.
Ha East Jaintia Hills– Wat hapdeng ka jingtwa khyndew, la lah ban pynioh biang ia ka jingpyniasoh ha ka surok bah (NH-6) da ka NHAI bad ha ka surok Dkhiah Sutnga Saipung Moulsei Haflong (DSSMH) da ka PWD, bad kam shym la don kano kano ka jingjulor kaba khraw ha kiwei pat ki bynta jong ka District hapoh kane ka taiew bad la pyntip ba ka pisa jingiarap kaba biang kaba don ha ka District.
Na ka liang u Chief Secretary u la bthah ia u DC ban pynsangeh noh ia baroh ki kam tih mar pohkhyndew hajan ki wah ne ki wahduid.
Ha West Jaiñtia Hills- Ki jaka ba shah ktah ki kynthup ïa ka Ummulong- Puriang bad ka surok Dawki – Amlarem, hynrei la pynïoh biang ïa baroh ki jingpynïasoh ia ki lynti syngkieng
La bthah ia ki ophisar jong ka PWD ban pynthikna ba la pyndap ia ki “thliew” kiba la mih ha ki surok, khnang ba ki kali kin lah ban iaid khlem kano kano ka jingkhanglad.
Ha East Khasi Hills- Ki don haduh 17 tylli ki surok ki la shah ktah na ka daw jong ka jingtwa khyndew ha ki jaka bapher bapher hynrei baroh la dep ban pynkhuid na ka bynta ka iaid ka ieng kali.
U DC u la pyntip ba uwei u briew na Nongmynsong u la khlad noh na ka daw ka jingngam jyllop ha ka wah kaba la shlei um ha Urkaliar, Shillong ha ka 23 tarik Jylliew 2024. Hynrei ia ka met iap la ioh ban sei haduh ka 1 tarik Naityng, 2024.
U Chief Secretary u la bthah ia u DC ban pyllait noh ia ka jingai jingiarap kat kum ki kyndon.
Ha Eastern West Khasi Hills- Ki don 21 tylli ki shnong kiba la shah ktah, 13 tylli ki surok la iathuh khamtam ka jingtwa ki kynroh (retaining wall etc.) ha shilynter ka Mairang — ka surok Rani Godown- Azara bad ka surok Mairang- Bypass.
La lah ban pyntreikam ban pynbiang mynta ia baroh ki lynti syngkieng.
Ha Ri- Bhoi — Kala don ka jingtwa khyndew ba malu mala ha Umbang ha ka 30 tarik Jylliew, 2024 khlem don kano kano ka jingjulor. Ym don ruh ka jingthut ha ki lynti syngkieng.
Ha West Khasi Hills- Ka jingtwa khyndew ha Tiehsaw, la pynkhuid bad pynbha hapoh 24 kynta. Ki jaka kiba lah ban shah ktah namar ka jingtuid palat jong ka wah la ithuh bad ki jaka kiba shah ktah ki dei ka Malangkona- Diengdoh. Na ka liang jong ka bor synshar District ki la buddien bha ia kane ka jingjia.
Ha South West Khasi Hills- La iathuh ba 3 tylli ki jingjia ka jingtwa khyndew, bad ym shym la don kano kano ka jingpynthut ia ka iaid ka ieng ki kali.
Ha North Garo Hills- Ym shym la don kano kano ka jingjulor kaba khraw bad la pynkhuid lut ia ki jingtwa khyndew.
Ha East Garo Hills- Ka jingpynkhuid ia ki jakhlia ka la jia na ka daw ka jingtwa khyndew ha ka shnong Songkama hapdeng Songsak bad Resubelpara, bad ka surok Songsak Mendipathar la lah ban siang bad pyndep.
Ha West Garo Hills- 4 tylli ki shnong ki la shah dkut lut ha Pattangre kaba hap hapoh ka Dalu Block, ha Dabelagre bad ha Kopogre hapoh Gambegre Block bad ha Sapalgre hapoh Selsella Block. U DC u la pyntip ba la leh ïa baroh ki lad ki lynti kiba donkam bad na ka bynta kito ki shnong ki bym lah ban leit, yn sa ai ïa ki lieng bad ki tiar kiba donkam.
U Chief Secretary u la bthah ba baroh ki lad ki lynti dei ban shim bad pynthikna ba ki painkhana, ki um dih, ki dawai, ki tiar GR kin poi sha kiba shah ktah hapoh 24 kynta. Baroh ki nongshong shnong kiba shah ktah dei ban pynkynriah sha ki jaka ai jingiarap bad ki tiar ai jingiarap ban ai ha ka dur jong ki jingbam, ka um dih, ki dawai, ki jingiarap ba nyngkong, bad ki mar ba kongsan.
Ha South West Garo Hills- 2 tylli ki jingtwa khyndew kiba heh ha surok KG lyngba ka jaka Zikzak ha 16th km bad surok BM sha Bainapara Koch la pylliait na ka bynta ki kali rit. Ka jingtwa khyndew ka la jia ha ka surok Betasing Mellim ha ki bynta ba shaing harud ka wah Dilni bad la pynbha shipor ban plie na ka bynta ki kali rit. La sam marbam na ka bynta ki longïing kiba shah ktah ha ka jingshlei um kaba la jia ha ka 1 tarik Naitung, 2024 bad 2 tarik Naitung, 2024 hapoh ka Reparara u C&RD Block, South West Garo Hills, Ampati.
Ha South Garo Hills District – 4 tylli ki jaka la iathuh ba ki la shah ktah bad ka jingtwa khyndew kaba khraw ha ka thaiñ Bolsalgre hajan Baghmara Circuit House, la shna ia ka subway bad la plie ia ka iaid ka ieng ki kali. Ka surok Dobakko ka la khang bad ka la ngam jyllop, hynrei ka don kawei pat ka surok na ka bynta ban pyniasoh.
Ka jingtwa khyndew kaba heh ka la jia ha Bolsal A’ding hajan Petrol pump shadien Baghmara, SBI, kaba ktah ia kawei ka Govt. LP School, ka ïingmane bad ki iing briew.
U Chief Secretary u la kdew ba ka advance fund kaba Rs 13.5 cr ka don bad ki DC bad yn sa pynioh shuh shuh ia ka pisa. U la bthah ia baroh ki DC ba kaba hakhmat eh ka long ban pynthikna ia ka jingpyniasoh ia ki shnong kiba la duh ia ku surok kum ha West Garo Hills District bad u la bthah ruh ia ka PWD ban pyndap ia baroh ki thliew ha ki suroak bad ban pynthikna ia ka jingiaid beit iaid ryntih jong ki kali ha ka jylla. Baroh ki district ki dei ban pynthikna ban pynbiang ïa ki marbam ba donkam, ki dawai, ka um dih bad ka jingpynbiang ïa ki jaka leit shabar ia ki lanot.