Kum shi bynta ban ai ka jingpynsngewthuh bad ka jingpynshlur ia ki paidbah nongthep vote jong ka West Jaintia Hills District hynnin ka sngi (20/02/23) ka ophis jong u Deputy Commissioner (Election), kala pynlong ia ka prokram kaba la tip kum ka Systematic Voters’ Education and Electoral Participation (SVEEP) Awareness 2023, ha Iawmusiang, Jowai.
Haba ai jingkren ha kane ka prokram, u Additional Deputy Commissioner, ma M. A Challam ula pynkynmaw ia ki paidbah shaphang ka hok ban thep vote kum ki nongshong shnong jong ka ri ba laitluid. Ula kyntu ia ki paidbah ba kin nang ban kiar na ki jingshah pynbeij kum ha ka dur jong ka pisa bad kiwei de ki rukom. Ula khot ia baroh ban wan iashim bynta pynduh ia kine ki jait jingsniew da kaba pyndonkam ia ka Mobile App kaba la tip kum ka cVigil kaba la pynioh da ka Election Commission jong ka ri India.
Ha kane ka prokram la wan ban sakhi da ki paidbah ba bun kiba la iashim bynta ha ka jingshad ha ki sur jingtem jong ki Nongtem nongput jong ka thaiñ kiba kynthup ia ka Nexus, ka LYNX, kiwei de ki nongrwai kynthup ia ka Lucy bad Mynnu. Ka don ruh ka jingpynbyrngia na u Icon jong ka District SVEEP u Paloi uba dei u dkhot jong ka Chiïung, kumjuh ka jingshad tynrai na ka Seiñraij Jowai.
