Ka Hynñiewtrep Integrated Territorial Organisation (HITO) hadien bala dep ban pynlong ïaka 6th Meghalaya Games 2025 ha u Kyllalyngkot 2025 ha Nongbah Jowai kala wad jingtip lyngba ka aiñ Right to information act 2005 khamtam eh ha kaba ïadei bad ka jingpynbiang ïaka um kaba long kawei na ki jingdonkam ba kongsan.
Kane ka Meghalaya Games 2025 kaba la neh haduh 6 sngi lynter haka Nongbah Jowai ha kaba la ïashim bynta kumba 3 hajar tam ki nongïashim bynta na kylleng ki District ka Jylla Meghalaya ha ki jingïalehkai bapher bapher naduh ki Indoor haduh ki Outdoor game bad ïa kitei ki 3 hajar tam ngut ki nongïashim bynta la pynsah ïa ki ha ki ba bun ki jaka kum ha Kiang Government College, Jowai Polytechnic Campus, Government Girls’ Secondary School, Wahiajer Multipurpose Sports complex bad sha kiwei kiwei ki bynta jong ka sor Jowai.
Ha kaba ïadei bad kane na ka liang ka seng kala pyrshang ban bud dein halor ka jingpynbiang ïa ka um sha kitei ki jaka sah jong ki nongïashim bynta da ka RTI na ka office jong u Executive Engineer PHE Electrical Division Jowai haka 21 April 2025 bad ïa kane la jubab ha u 20 May 2025 bad lyngba ka RTI la pynpaw ba la pyllut haduh 2 klur 71 lakh 46 hajar 370 tyngka tang naka bynta ka jingpynbiang ïaka um haki jaka sah.
Halor katei ka jubab ïaka RTI la lap ruh shibun ki jingkylli ba ka office u Executive Engineer PHE Electrical Division Jowai um lah ban jubab, haba kylli hato ki Contractor kila submit ne em ïa ki Utilisation Certificate, ka jubab ka long ym don bad kane kala pynlyngoh ïa ka seng ba ka don ei ei sha lyndet na ka jingbamsap ba shyrkhei ha kane ka kam ba kumno kat ka project kaba kot da ki klur ym don Utilisation certificate.
Shuh shuh haba pan ïa ki Cash memos ki voucher ban pyni ïaki jingthied ïaki tiar ba pyndonkam ha kaba ïadei ba ka jingpynbiang um ka jubab ka long ym don bad ruh haba pan ïa ka copy jong ka completion report ne ka syrnod ban pyni ba ka jingtrei kala dep ruh ka jubab ka long kumjuh ym don.
Kaba pyntharai sniaw shuh shuh ïa ka seng ka long ba ka office u Executive Engineer PHE Electrical Division Jowai kala ai tang da ka Formal Work Order sha ki Contractor kam da dei eh katta ka work order kaba paka bad ïa kitei ki jingtrei baroh la ai por ruh tang hapoh 11 sngi ban pyndep.
Halor kane naka liang ka seng kan sa buddein bad ai jingthoh sha ki bor ba halor bad lada ka seng kam ïoh ïaka jingshai kaba lah ban pynhun ne jingshai kaba shisha, kin sa leit tied jingkhang sha ka ïingbishar ne Lokayukta, la pynkut ka kyrwoh na u General Secretary sengkmie u bah Wanbun N. Dkhar.
