Ka KSU South West Khasi Hills District ha ka 19 u Nailur 2025 ka la sei madan ïa ki jingshisha halor ka jingthmu ai jaka shipai jong u Syiem Maharam ban shna ïa ka Unit Headquarter jong ki shipai ha Sohboitram (Photmula).
Katkum ki jubab RTI la lap, ba na ka liang u Syiem u la dep phah lypa ïa ka shithi shaki bor sorkar (Addl. Deputy Commissioner) haka 6 tarik u bnai June 2025 ban ong ba ma u lem bad ka Dorbar Hima ki pdiang ïa kane ka jingtyrwa ki shipai wat lada ïa ka Executive Dorbar Hima dang lum hadien 2 taïew hadien ba u la dep ai ïa kane ka shithi kata haka 28 tarik u bnai June 2025.
U samla Forwardman Nongrem (President KSU South West Khasi Hills District) u la ong ba kane ka jingleh jong u Syiem ka pyni ba u kheiñ dewthala ïa ka Executive Dorbar Hima bad u shu shim ïa baroh ki Myntri Shnong bad ki Lyngdoh kum ki niang kohnguh ba un pynïaid katba mon ïa ki, Kane ka pyni ruh ïa ka jingleh donbor da kaba kynthoh ruh ba la ka Hima Maharam ka dei ka Hima synshar paidbah ne ka Hima synshar donbor shimet jong u Syiem.
Une u nongïalam u la ong ruh ba ka seng lem bad ki khun hajar bad kiwei kiwei ki sengbhalang ki sngew ban pyrshah jur ïa ka jingthmu namar ngi tip shai ba ka Unit Headquarter ka dei ka jaka ba ki shipai ki mut pynlong shnong na ka bynta jong ki lem bad ki khun ki kti jong ki kumba long ha kiwei kiwei ki jaka kum ha Upper Shillong, Happy Valley bad kiwei kiwei.
Katkum ka RTI une u nongïalam u la ïathuh ba ki shipai ki la leit ban jurip tang ïa ka Photmula hynrei kim kwah pat ban leit sha ki jaka ba hap ha ki border line ba ïajan bad ki fencing, Kane ka pyni ba ka don kaei kaei sha lyndet halor kane bynta da kaba kdew ruh ba lada ki shipai kin ïoh thaw shnong ha ka Unit Headquarter nalor kan ktah ha kiba bun rukom kan pynlong ruh ïa ki paid khasi ba kin nang rit paid shuh shuh ha kito ki thaiñ nalor ki la rit paid lypa.
Haba ïadei bad ka thungkam thungjam une u samla u la ong ba ka dei ka bym shongnia namar na kaei kaba ngi ïohi ka long haki jaka shipai ym shym la ïohi ruh ba ki khasi ne trai shnong kin ïoh wat ïa ka kam ban sar phyllaw.
Ka seng ka la pynshai ruh ba ngin nang ïai pyrshah halor kane ka mat kat haduh ba u Syiem ryngkat ka Dorbar Hima kin ai da ka jingthoh bad pynshai paidbah ba ki la weng noh ïa kane ka jingthmu.
