Ki shipai kiba peitngor jong ki BSF Meghalaya ki la jop ban pynduh jait ïa ka jingpyrshang ban khaïi tuh ïa ki masi, bad ioh ban kurup ïa ki 64 tylli ki masi na u pud u sam jong ka ri Meghalaya. Ia kine ki masi la shalan tuh sha Bangladesh lyngba ka thaiñ khappud jong ka West Jaiñtia Hills District jong ka Jylla Meghalaya.
Da kaba pynshong nongrim ha ki jingtip ba kyrpang, ki shipai BSF jong ka 4th Battalion ki la pynlong ia ka jingkhynra kaba kyrpang hajan u pud u sam jong ka Ri. Ha kane ka jingkhynra, ka seng ka la jop ban pyllait im ia 64 tylli ki masi kiba la buhrieh ha kawei ka jaka khlaw, kiba la thmu ban shalan tuh sha Bangladesh. Ia ki masi ba la shah kem la aiti sha thanat pulit Concern ban leh ia kaba donkam.
Ha kawei pat ka jingkhynra, ki shipai BSF ki la ioh kurup 2310 kilo ka shini kaba la thep ha ki lai tylli ki kali Bolero pickup, kiba thmu ban shalan tuh sha Bangladesh lyngba u khappud International jong ka East Khasi Hills.
Da kaba pynkhlaiñ ia ka jingpeitngor bad ka jingpyrshang kaba bteng ban khanglad ia ki kam khaïi be-aïn ha khappud Indo- Bangladesh, ki BSF Meghalaya ki la ioh kurup palat 800 tylli ki masi bad 2310 ton ka Shini kaba thmu ban shalan tuh sha Bangladesh na ki jaka khappud bapher bapher jong ka Jylla Meghalaya naduh u bnai Jymmang 2024.