Shibun ki tnad sorkar bad kiwei pat ki la iasnoh kti lang ban pynlong ia ka free mega health camp ha Thadlaskeiñ Block jong ka West Jaintia Hills, Meghalaya, kaba ha kajuh hi ka sngi la lah ban leh ia ki test jong ki nongpang bad kumjuh ban ai jingsumar ruh, ryngkat bad ka jingai jinghikai ban pynsngewthuh ia ka koit ka khiah, ka jingia syllok bad ka jingpyntikna ia ki jingsumar ba khlem jingkut.
La pynlong ia kane ka free mega health camp ha North East Adventist University, Khliehtyshi village, Thadlaskeiñ block jong ka West Jaintia Hills District ha ka 10 tarik u Risaw, 2023. Kane ka dei ka sien ba nyngkong ban pynlong kum kane ka health camp ha ka jylla Meghalaya kaba long kawei na ki health camp kaba bha tam ha kaba la pyndonkam da ki tiar ka juk ba mynta kum ka RT-PCR, kumjuh ruh ban ai jingsumar ha kane ka health camp ha ka juh ka sngi.
Kiba la ai jingkren ha ka sngi plie ia kane ka free mega health camp ki long i Kong D.V. Lyngdoh, Additional Municipal Commissioner, West Jaintia Hills District, Dr. Helen J. Uriah, District Maternal and Child Health Officer, Health Department, West Jaintia Hills District, Dr. Brightstar Langbang, Block Development Officer, Thadlaskeiñ, u Shiva Sriram, Vice President ka Molbio Diagnostics bad Dr. Darivianca E. Laloo, General Manager ka Molbio Diagnostics.
Ka Thadlaskeiñ block ha kaba la pynlong ia kane ka health camp, ka long ka block kaba dang sahdien bha ha ka jingdon ki jaka ai jingsumar na ka bynta ki nongshong shnong kane ka block. Ba ka jingai injek bad tika ka duna bha ha kane ka block, bad kham bun na ki khynnah kiba hapoh ka rta 2 haduh 5 snem ki bym pat ioh ia ki injek ne tika ban iada na u khñiang ñiangpyrsit (measles). I Dr. Helen J Uriah, Maternal and Child Health Officer, West Jaintia Hills District i la ong ba ka long kaba donkam ban kynmaw ba ki briew ba la pynkhreh bad pynbiang da ka office u Block Development Officer bad da ki seng trei mon sngewbha ki la lah ban ioh shibun ki jingmyntoi ha ka koit ka khiah tang na kawei ka jaka.
Ka dei ka sien kaba nyngkong ba ki tnadtrei kam bapher bapher ki la wan ban snohkti lang ban pynlong ia ka free health care camp kaba iar bad ba kynthup shibun kiei
kiei. Naduh ki tnad sorkar, ki jaka pule ban wad bniah, ki skul bah, ki seng shimet, ki seng trei mon sngewbha, ki tnad bei tyngka na pdeng kiwei pat, ki la iasnoh kti lang ban pynurlong ia kane ka jingiatrei lang.
Kane ka long kaba donkam shi katdei bad la dei ban shim bad pyndonkam ia kane ha kylleng ka ri katba lah khnang ban pynpoi sha ki briew, ban pynioh ia ki lad ban pynbiang ia ki dawai dashin ia ki nongpang, ong u Shiva Sriram, u Vice President ka Molbio Diagnostics (u nongpynmih ka Truenat kaba dei tang ma ka kaba la ioh jingithuh na ka World Health Organisation (WHO).
Ka jingiatrei lang jong kiba bun ki tnadtrei kam sorkar ha Meghalaya ka pynlah ban tip kloi ia ki jait jingpang bad ban ai jingsumar khlem pynslem
Ki tnadtrei kam kiba don bynta lang ban pynlong ia kane ka health camp ki kynthup ia ka North Eastern Indira Gandhi Regional Institute of Health and Medical Science (NEIGRIHMS), Health and Family Welfare Deparment, District Medical and Health Office, West Jaintia Hills district administration through Thadlaskkeiñ Block Officer , ka Meghalaya State Rural Livelihoods Society -MSRLS , Community groups, International NGOs ( Rotary Club of Jowai, Johns Hopkins Program for International Education in Gynaecology and Obstetrics- JHPIEGO, North East Slow Food and Agrobiodiversity Society – NESFAS), local NGOs (Grassroots – Shillong, Voluntary Health Association of Meghalaya – VHAM) bad Molbio Diagnostics.
Ka dei ka sien kaba nyngkong ha ka ri India ban ioh ia ka health camp kaba kynthup ia shibun ki lad jingsumar ha kaba lyngba kane ka health camp ki nongpang ki ioh ia ki jingmyntoi naduh ka jing test ia ki nongpang haduh ka jingai jingsumar ia ki. La ai ruh ia ki injek na ka bynta ki khynnah bad ki rangbah, ka jingpeit bniah ban lap ia ka daw ka jingpang da kaba leh ia ki test katkum ki jait jingpang, kaba shim khia, ka jingai jingsumar, ki dawai dashin, ki jing eksamin da ki doctor, ka jingiasyllok bad kiwei kiwei pat ki jingmyntoi, ong u Sriram.
Nalor ka Truenat, la pynstet ruh ia ki jing test bapher bapher ha kane ka health camp da ka ba pyndonkam ia ki kor ka juk ba mynta kum ka ECG, Portable Ultrasound, ki kor X-ray bad ki tiar ban screen ia ki nongpang ban lap ia ki jingpang bad ban ai ka jingsumar ha kajuh ka por.
Ki briew kiba wan sha kane ka camp ki hap ban ai kyrteng bad iathuh ia ka jingshitom jong ki ha ki doctor bad ki nurse kiba shong ha jaka registration, ia ka ban sa peit bniah biang ia ki sa shisien da ki doctor. La ai ka jing eksamin ba khlem da lut eiei da ki doctor kiba la pyntbit ia lade (kum ki doctor kiba la pyntbit ha ka liang ka obstetrics bad gynaecology, paediatrics, medicine, ENT), ryngkat bad ka jingpeit bniah bad eksamin na ka bynta ki jait jingpang kum ka Tuberculosis (TB), Cervical cancer, Breast cancer , malaria bad dengue, chikungunya, sexually transmitted diseases bad HIV, influenza, respiratory diseases bad scrub typhus.
Ban pyntikna ban buddien bad ban shim khia na ka bynta kito kiba don ia ki jingpang ba la kdew haneng, la phah ia ki kyrteng jong ki sha ki prokram bapher bapher kiba hap hapoh ka jingpeit ka National Health Mission (NHM), kum ka jingpang TB, HIV, na ka bynta ka jingkoit jingkhia ka kmie bad I khyllung. La ai ruh ia ki dawai na ka bynta ki katto katne ki jingpang ba la kdew haneng, ryngkat bad ka jingpeit bad ka jingiasyllok ki doctor na ka bynta ki jingbam kiba tei, ka jingkoit jingkhia ia kiba dang khie samla, ka STDs, TB, HIV, malaria, jingpang bampong bad kiwei kiwei.
Ha kane ka sngi baroh shisngi la don ka jinghikai bad jingpynshai ia ki paidbah halor ka ka koit ka khiah kaba kynthup ia ka Intensified Mission Indradhanush (IMI 5.0), ka jingshim khia ban ai tika ia ki khynnah, TB, HIV bad kiwei kiwei.
Ka jingthmu jong kane ka health camp ka long ban pynioh kloi ia ki jingpeit thuh, ban lap ia ka daw bad ban shim khia ban ai jingsumar ia ki jait jingpang ba bun, bad ka jingpynshai ia ki nongshong shnong halor ka koit ka khia ha ka shnong ka thaw.