U Samla Pynshngain Kurbah uba la mihkhmat ia ka Jylla Meghalaya sha ka lympung National Games kaba 38 lyngba ka jingialehkai kieng lieng ia kaba la tip kum ka Canoe Men Slalom, u la ioh ban khur ia ka takma Rnong kaba dei ruh ka takma kaba la pynioh mynsiem ia ka Jylla khamtam ia ki nongialehkai kiba la leit ïashim bynta ha katei ka lympung kaba heh.
Ia kane ka lympung kaba la sdang naduh 28 tarik Kyllalyngkot 2025 bad kaba yn pynkut ha ka 14 tarik mynta u bnai, la pynlong ha ka jylla Uttarakhand. Hadien shi taiew pura ba la sdang ia katei ka lympung, ka jylla ka la ioh ban khur tang kane kawei hi ka takma lyngba une u samla uba na ka shnong Lawbyrwa Ri-Bhoi District.
Une u samla uba la wanrah burom ia ka Jylla ha kane ka snem u dei ruh u nongialehkai uba la khur ruh ia ka takma rupa ha ka lympung Khelo India Youth Games 2023 ia kaba la pynlong ha ka Jylla Madya Pradesh.
