Ki khubor kiba la phah da u Nongai Khubor jong U Yutip napoh ka thaiñ Labang-Nongphyllut, Elaka u Doloi Nongphyllut, la ong wat lada ka sorkar ka kwah ban pynduh jait (Eradicate) ia ka jingpang Malaria, hynrei pat ha ki katto katne tylli ki shnong jong ka Elaka, kum ka Murap, Muriap, Mooknor, Laher, Umsalait bad kiwei de kane ka jingpang khiehshohrih (Malaria) ka la trei bor bah ha kaba bun ki nongshong shnong ki shah ktah na kane ka jingpang Malaria.
La ong ruh kiba pang (Malaria) na kito ki longiing kiba kham biang ka ioh ka kot ki phah sumar sha ki PHC bad CHC kiba kham jan kum sha Namdong Community Health Centre, Nartiang bad District Civil Hospital Ialong bad kito pat kiba ym don lad ki shu phah thied ia ki Dawai Malaria na ki Pharmacy.
Ka khubor kaba la iohlum na Community Health Centre (CHC) Namdong la ong ba ki nongshong shnong kiba na Morap, Moriap, Laher bad kiwei de ki shnong kiba marjan jong ki kiba wan phah Test bad shim Dawai na Namdong CHC, la jan baroh ki nongwan test bad shim dawai ki dei ki nongpang kiba ioh Malaria.
La ong ruh ba ia kane ka jingkem pang Malaria jong kito ki shnong ka Elaka, ki shnong kiba dang don hapoh ka jingiaknieh pud hapdeng ka Meghalaya bad Assam la pynsngew sha ki bor District jong ka West Jaintia Hills, hynrei pat haduh ba thoh ia kane ka khubor ym pat lah ban tip haduh katno ki bor District jong ka West Jaintia Hills ki shim khia ia kane.
Ha ka juh ka por u nongai khubor u iathuh ruh ba don ki longïing kiba ioh kem pang na kane ka jingpang Malaria baroh baroh shi- iing bad la shu wan iarap ia ki ha ka shet ka tiew bad leit thied dawai khiehshohrieh (Malaria Tablets) na ki Pharmacy da ki marjan iing kiba sbun mynsiem bad ka bai dawai artat pynkut u nongai khubor.
