Ka jingsniew palat u surok na Shilliang Myntang, Samatan, Thadialong haduh Takhniang, Nongjngi kiba hap hapoh ka 4 Mowkaiaw Constituency ki pynpaw ka jingsngewkhia bad suhsat haduh katta katta namar ba ka sorkar jylla ka la ieh bein ia u surok da ki phew snem wat haduh mynta khlem don shuh ka jing maramot ne shna thymmai. Une u surok ba pyniasoh ia ki ba bun ki Shnong naduh Mukroh, Barato, Thngrain, ShilliangMyntang haduh ban poi sha ka Shnong Nartiang, Wahiajer. Ummulong. Kumba long mynta ia une u surok la shna naduh Nartiang haduh Tahkhniang ba long tang shiteng na u ne u surok bad kaba sah ka long u ba la jot rathai haduh katta katta.
Kum ki nong shong shnong kiba shong ba sah ha kane ka dong ka thain ki la mad shibun ki jingeh jingshitom khamtam haka leit kawan ka kit ka bah namar ka jingsniew palat jong u ne u surok ba dap tang ki thliew ki krem. Shuh shuh halor kane kum ki nong shongshnong ki dap da ka jingdiaw mynsiem ba ka sorkar ka khlem phai khmat shuh sha u ne u surok.Namar lynba u ne u surok ka la pynia soh bun tylli ki shnong ban poi sha ka Hospital PHC Nartiang khamtam ha ka pang ka shitom bad kumjuh ia kiba leit shim dawai na ki jaka sumar.
Kane ka jingsniew une u surok ka ba buh jingeh ia ki paitbah ki ba leit donkam sha ka Police Station kaba don ha Nartiang namar kine ki Shnong ki hap hapoh ka Police Station Nartiang, bad nalor kata ki khynnah skul kiba leit pule ha ki skul kiba don ha ka Shnong Nartiang, Ummulong Jowai bad wat sha duh sha Nongbah Shilong bad kiwei ki jaka ki hap iaid lyngba une u surok.
Ym tang katta hynrei wat ia ki nongrep kiba leit sha ki iew kiba don ha Nartiang Iew pynsing kaba don ha ka Shnong Wahiajer kum ka iew baheh ha poh ka ri Jaintia ki la mad shibun ki jingeh namar ki jingsniew jong u ne u surok ki shem shitom ban pynpoi ia ki mar rep jong ki ha kine ki iew.
Halor kane ka jingsniew ka ne ka surok ka la kthah ia ki paitbah ha baroh ki liang namar ka surok na Mukoi lum haduh Barato la dep shna pynbha bad na Tahkhniang Nongjngi haduh Nartiang la dep shna bad kaba sah ka long hapdeng une u surok naduh Barato haduh ShilliangMyntang la dep shna da ka Scheme NEC bad u long u surok u ba rit bad kaba sah ka long naduh ShilliangMyntang haduh Tahkhniang haduh Nongjngi u long u bym long shuh ban iaid da ki kali rit lait noh tang da ki Truck bad ki Dumper.
Halor kane ka jingeh ba ki paitbah jong kitei ki shnong ki ia kynduh ban iaid lynti na u tei u surok, ki dawa jur bad kyrpad ia ka sorkar lyngba ka tnad PWD kan shimkhia ban pynbha ia kane ka surok namar kane ka surok ba pyndonkam ki piatbah ha ka leit kawan ka pang ka shitom bad ha baroh ki liang. Lyngba ka sur u paitbah ban phai khmat sha u ne u surok u ba la jot rathai, ki la pynsngew ruh ba kum ki paitbah jong kane ka thain ki don ka hok ban ioh ia u surok u ba bha kum ba ioh lem kiwei ki nong shong shnong jong ka jylla.