Hadien 13 tylli ki jingiakhun mynta ka samoi, ka Ryntih FC ka la ioh ia ka jingjop kaba 2 hynne ka sngi, kata hadien ka jingjop da 4-1 kol pyrshah ia ka Nongthymmai SC ha ka jingiakhun ba la pynlong da ka Shillong Sports Association (SSA) ha madan SSA stadium Polo Shillong.
Ka Ryntih kaba la neh mynta ha ka kyrdan ba khatduh jong kane ka lympung Shillong Premier League (SPL) 2024-25, kan duh jingkyrmen shibun ban ïoh ïakhun biang na ka bynta kane ka lympung ha ka samoi ba lah dep namar ka jingbym lah ban ioh kamai bun poiñ. Haba bishar katkum ka jingialehkai jong ka Nongthymmai ruh, kane ka kynhun ka lah ban shah pynhiar kyrdan noh namar ka jingduna palat ha ka jingioh poiñ bad ka tam tang 4 poiñ ia ka Ryntih kaba don ha ka kyrdan ba khatduh.
Haba phai ha ka jingiakhun kaba mynta ka sngi, ym don ba lah ban poi pyrkhat ba ka Ryntih ka lah ban thep haduh 4 kol ha kane ka jingiakhun. Ban nujor bad ki jingïalehkai ba lah dep, ka Ryntih ka la pynkylla shibun ia ka buit ialehkai bad khamtam ka jingbuh beit (position) ia ka jaka ki nongialehkai. Lah ban kdew ruh hangne ba dei lyngba kane ka jingwanrah thymmai ia ka rukom ialehkai, ka Ryntih ka la lah ban ioh ia ka jingjop don burom ha kane ka sngi.
Ha ka jingiakhun jong ka kylla step, baroh 2 kynhun ki khlem ioh ban pynkhih jar, dei hadien ka kylla miet, katta ha ka minit ba 53, u Wanshanlang Dkhar u la ioh ban thep shi kol na ka bynta ka Ryntih kaba dei ruh ka kol kaba la pynioh mynsiem ia ka kynhun bad bteng ban thep kol biang tang hadien 3 minit lyngba u Andy Mawthoh. Hadien katei ka kol u Andy u la ioh ban thep shuh sa shi kol ha ka minit ba 68 bad sa shi kol na u Wanshanlang ha ka minit ba 82. Ka Nongthymmai ka khlem leit phai thylli sha la ïing hynrei ka la ioh shi kol lyngba u Powell Chyne ha ka minit ba 79.
Ia ka kyrdan ba nyngkong jong kane ka lympung la knieh noh da ka Rangdajied United FC na ka Mawlai SC da ka jingioh 29 poiñ na 13 sien ki jingiakhun.
