Jowai: Ka Jaiñtia Students’ Movement (JSM), Eastern Region mynta ka sngi ha ka jingialam u President Bah Wellson R D Siangshai ryngkat ka jingiadonlang u President Southern Region Bah Skhembhalang Dkhar, Vice President Bah Thaw Nongtdu bad Education Secretary Eastern Region Bah Precious S Lamo, Discipline Secretary Bah Eiladmiki Dkhar ki la leit ia kynduh bad ai jingthoh sha ki bor ba dei peit jong ka NHAI, East Jaiñtia Hills bad sha u Deputy Commissioner East Jaiñtia Hills District halor ka jingsniew ka ba sha palat jong u Surokbah NH-6 kaba la ktah shi katdei ia ka leit ka wan jong ki paidbah ha kaba la dap sa tang ki thliew ki syar ha shi lynter utei u Surok bah.
Ha ka juh ka por ka seng ka la dawa ban maramot shisiendon naduh Tuber Shohshrieh sha duh Malidor, namar la sakhi ruh ba ka jingsniew utei u Surok bah ka wan rah ia ka jingjia accident ba khah khah ha shi lynter utei u Surok.
Ka Seng ka la pynsngew ruh ba ka jingbym pat dep ban shna ia ki Nala um ha shilynter u NH-6 hapoh ka East Jaintia Hills District khamtam ha ka thaiñ Wapung, Ladrymbai Khliehriat bad kiwei kiwei ki shnong haba poi ka aiom slap baroh ki jakhlia ki la tuid sha ki Surok bad wanrah ia ka jingsma iwtung ia ki paidbah nongleit nong wan.
Namar kata ka seng ka dawa ia ki bor ba dei peit ban shimkhia ia kane ka kam ba ki paidbah ki mad jingeh. La da ki bor ba dei peit kim shimkhia ka seng kam banse ban khang ne phah sangeh ia ka jinglum pisa jong ka NHAI ha Toll Gate ka ba don ha Lumshnong.