Ka Hynniewtrep Youth Council (HYC) mynta ka sngi ka 20 tarik Naiwieng 2025 ka la wan ban ban jurip halor ka jingioh jingtip ba ka don ka jingtei ia ka jaka mane blei ha ka phyllaw jong ka Ophis Central Bureau of Investigation (CBI) ha Mawdiangdiang.
Haba kren sha ki lad pathai khubor na ka liang u President ka HYC u Bah Roy Kupar Synrem u la ong ba ka Seng ka la wan iakynduh ia u DIG ka CBI ban wad jingshai halor ka jingioh jingtip ba ka don ka jingtei ia ka jaka mane Blei ha ka phyllaw jong ka Ophis CBI ha Mawdiangdiang. Hadien ka jingioh jingpynshai na u DIG ka CBI, u President ka Seng u la ong ba kam don kano kano ka jingtei ia ka temple bad kane ka building ka dei ka Community Centre na ka bynta ki nongtrei kiba trei ha kane ka ophis CBI.
Nalor kata u la ong ka Seng ka la ong ia u DIG ba lada ki nongtrei ki pynlong ia ka jaka mane blei ka Seng kam ailad da lei lei ruh.
Ka Seng ka la ong ba kam pyrshah ia kano kano ka niam hynrei ka pyrshah ban tei ia kino kino ki jaka mane blei ha ki ophis sorkar namar ka Constitution jong ka Ri India ka ong ba ka sorkar kam dei ban iashah liang iano iano ruh la ka dei ka niam ne ia kano kano ka jaitbynriew. U la ong ba ka Seng ka khmih lynti ruh ba ka CBI kaba dei kawei na ki tnad treikam jong ka Sorkar India kam dei ban buh ia kano kano ka dak ba ka iashah ia kano kano ka niam.
Na ka liang u DIG ka CBI u la iathuh ba kam don kano kano ka jingtei ia ka temple lane ka mandir bad ka dei ka jingtei ia ka Community Centre na ka bynta ki nongtrei kiba shong ba sah ha kane ka Campus jong ka CBI bad u la kular ruh ia ka Seng ba kam don kum kata ka jingthmu ban pynlong ia ka jaka mane Blei ne ka temple ban buh jong ki nongtrei kiba don ha kane ka ophis CBI.
Khatduh u la ong ba ka Seng kan iai buddien ia kane ka kam bad ka Seng ka ngeit ba kane ka jingiakren mynta kan nym don ka jingkylla hadien bad lada ka don ka jingkylla ka Seng kan sa shim da kiwei ki sienjam haba iadei bad kane ka kam.
