Ka Hynñiewtrep A’chik National Movement (HANM) Jaintia Zone bad Federation of Khasi Jaintia & Garo People’s (FKJGP) Jaintia Zone ki la maham ïa ki briew kiba ju bret pathar ïaki jaboh jabaiñ khamtam ki bitor bad ki plastik ha ki lynti ki syngkien, ha surok bah, ki surok pohshnong bad ki lum ki wah.
Kane ka jingmaham ka la wan hadien ba ki ar seng ki lap ba ki don ki briew kiba ki ju mlien ban bret pathar ïa ki jaboh jabaiñ jong ki kat shaba lap ba shem khamtam ha ki lynti syngkien, ki jaka jngohkai pyrthei, ki lum ki wah bad kiwei kiwei ki jaka paidbah kiba don ha East bad West Jaintia kaba wanrah ka jingsah kut ki nala da ki jaboh plastic bad buh ka jingma ba khraw ïa ka mei mariang bad ka koit ka khiah u briew, la ong u working President ka HANM Jaintia Zone u Pynshngaiñ Papang.
U ma Papang u la ong, ki jaboh jabaiñ kum ki jingsop khyllung (Huggies), ki plastic ba bret pathar sawdong sawkun ka mariang ki tuid sha ki wah bad ki wah duid hadien bala hap slap bad kane ka pynjaboh ïa ki um ki wah kaba ym bit shuh ban pyndonkam ïa u briew bad kaba ka ktah ïa ki jingim hapoh um bad baroh ki jingthaw ba im.
Shuh shuh katkum ka jinglap bad ïohi ki ar seng, la ong ba bun ki wah ha baroh ar ki District kim bit shuh ban pyndonkam. Ha ba ïadei bad ka wah Umïurem kaba don ha Shangpung kaba ki briew ba shong ba sah sawdong jong ka, ki dang pyndonkam ïa ka ha kaba dih ba bam, sait bad khlieng te kumta ki arseng ki tieng ïoh ba kane ka wah shisien ka sngi kan kylla long kum ka wah Umkhrah na ka jingbret pathar ki briew ïa ki jaboh jabaiñ.
Ki ar seng ki maham ïa baroh ki briew kiba shong ba sah sawdong ka wah Umïurem ba kim bit ban pynjakhlia khamtam ban bret plastic harud kane ka wah bad lada lap yn pynshitom tyngeh katkum ki kyndon aiñ mariang ne (Environmental Act).
Ki arseng ki maham tyngeh ruh ïa ki nongshong kali kamai (passenger) ba kim bit ban bret ïa ki plastic jingbam ha shi lynter ka surok bad la kyntu ïa ki nongñiah kali ban pynbiang ïa ki kynja dustin hapoh ki kali bad ban bret ha ki jaka ba la buh da ki dorbar shnong ban bret ñiut.
Nalorkata la maham ruh ban nym bret pathar ïa ki klong ki bitor hadien ba la dep pyndonkam ha ki jaka jngohkai pyrthei bad sha ki lum ki wah.
U Organizing Secretary FKJGP West Jaintia Zone u Wompher Wann ula ong ba na ka liang ki ar seng kin sa peitngor bha halor kane ka kam bret jaboh bad nangne shakhmat la kyntu ïa baroh ki paidbah ba kim dei ban pynjakhlia ïa ki lynti syngkien paidbah bad baroh ki jaka jngohkai hapoh ki ar District nalor kata la kyntu ruh ïa baroh ki nongwan jngohkai ban pynneh ïa ka jingkhuid jingsuba ki jaka jngohkai. Ki arseng ki kyrpad ïa ka sorkar ba kadei ban buh ïa ki Recycle plants (pynkylla ïa ki plastic sha kiwei ki mar) ha baroh ki ar ki District ka Ri Lum Jaintia khnang ban myntoi ki paitbah nongshong shnong.