Jowai: Ka Cabinet Committee on Economic Affairs (CCEA) hapoh ka jingialam jong u Prime Minister ka ri u Narendra Modi mynta ka sngi kala kubur ban pynioh pisa haduh Rs.77.45 klur tyngka ka long shi bynta ban pynim biang ia ka North Eastern Regional Agricultural Marketing Corporation Limited (NERAMAC), kaba dei ka Central Public Section Enterprises hapoh ka jingkhmih jong ka Ministry of Development of North Eastern Regional (MDoNER).
Ka jingpynkhie im biang ia ka NERAMAC kan wan rah shibun ki jingmyntoi ia ki nongrep jong ka thaiñ shatei lam mihngi ka ri India ong katei ka Committee. Lyngba kane ka tnat yn sa lah ban pynbha shuh shuh ia ka rukom rep rukom riang, kan pynioh ruh ki jinghikai ha ki liang bapher bapher ia ki nongrep, kan thaw ruh ki lad ki lynti ban pyniaid iew ia ki mar ba la pynmih na kane ka thaiñ sha ki iew jong ka pyrthei.
Lyngba ka jingpyntrei ia kane ka tnad la khmih lynti ba kan sa lah ban pynioh jingtrei haduh 33,000 ngut ki nongshong shnong kane ka thaiñ.