Mynta ka sngi u Myntri Rangbah ka jylla Meghalaya u Conrad K. Sangma u la kren ia ki jingeh bapher bapher jong ki paidbah ha ka jingialang jong ka ‘CM – Connect outreach’ kaba la long ha Nongstoin, West Khasi Hills.
Ha kane ka block level interactive programme ba la pynlong na ka bynta ki shnong kiba hap hapoh ka Nongstoiñ Block, la wan ïashim bynta da ki heh bad ki nongmihkhmat jong ki tnad bapher bapher bad ki nongmihkhmat na ki shnong.
Ki nongshong shnong bad ki nongmihkhmat ki la pynpaw ïa ki jingeh bapher bapher bad ki la pan ruh ka jingïarap na u Myntri Rangbah ka Jylla.
Ki mat ba la pynpaw pyrthei da ki paidbah ki long halor ki jingpynjari kyndon na ka bynta ki surok bad ki jingkieng, ki jaka sumar, ka jingpynroi ia ki jingtei ha ka kam jngohkai pyrthei, ki jingtei ia ki jingialehkai, ka jingdon jong ki bank, ka jingpynkhlain ia ki jingpynjari ia ki skhim flagship, ka jingpynbha ia ki skul, ki jingshakri ha ki jaka sumar mrad, bad kiwei kiwei.
U myntri rangbah u la shah shkor bha ia baroh ki mat bad u la ai jingbthah ia ki heh jong ki tnad bapher bapher ban leh ia kaba donkam.
Haba kren shaphang ki jingeh halor ki jaka sumar, u myntri rangbah u la kdew ba ka sorkar ka pynskhem ia ki jaka sumar kiba la don lypa ban pynbun ia ka jinglah jong ki.
U la pynpaw ruh ba ka sorkar kan ai jingïarap na ka bynta ki jingtei sha ki seng bym donkam kamai ban pynbha ïa ki jaka sumar ba ki la don lypa.
Shuh shuh u la pynbna ruh ba ka sorkar kan sa shimkhia ban kyntiew kyrdan noh ïa ka Nongstoin Civil Hospital kham kloi.
Halor ki jingtei ha ki kam ialehkai, u myntri rangbah u la pyntip ba ka sorkar ka bei tyngka palat 1000 klur, ha kaba pynbha ia ki jingtei ialehkai ha kylleng ka Meghalaya bad la pynthikna ba ka sorkar kan iatreilang bad ki paidbah ban seng ia ki jingtei ialehkai ha ki jaka nongkyndong.
Haba jubab ia ka jingpan jingiarap sut na ka bynta ki SHG, u la ai ka jingkular ba un sa rah ia kane ka kam ha u myntri pla tyngka ka sorkar pdeng.
Haba jubab ia ka jingkyrpad halor ka jingshna ia ki surok shnong, u myntri rangbah u la pyntip ba katto katne ki projek surok ruh yn sa sdang lyngba ka prokram CM Rural Connect.
Haba ai jingkren sha ki paidbah, u la ong ba ka CM Connect ka dei ka lad ïa ka Govt ban sngap bad pynbeit ïa ki jingeh jong ki paidbah. U la pynshlur ruh ïa ki MLA, ki Department Head ba kin pynïasnoh bad ki paidbah ha ka kyrdan jong ki.
Ka CM Connect kaba la long mynta ka sngi ha Nongstoin ka dei kaba phra kaba la pynlong ha ka jylla bad u Myntri Rangbah u la ong ba un dang bteng ia ka jingiaid ban wanrah ia ka jingsynshar kaba kham jan sha ki paidbah.