Hadien ba la khylliap Lama noh ia ka Trinamool Congress (TMC) ha Nongthymmai Constituency na ka jingmih noh ki Nongïalam ba hakhmat kane ka seng kynthup ia ki nongkyrshan kiba la pynjop ia u Bah Charles Pyngrope u President ka TMC, u ba long ruh u MLA ka TMC na Nongthymmai Constituency, mynta u la hap ban shong marwei ha ka TMC ha Nongthymmai khlem ki nongkyrshan bad ki Nongïalam.
Ha kaba iadei bad kane, u Bah Charles u la ong ba yn ym lah ban khang iano iano ruh lada ki la kwah ban ieh ia ka party. “Baroh ki la ieh ia nga , ngam lah ban leh eiei halor kata namar ngam lah ban khang ia ki ” u la ong.
Lah ban kdew hangne ba ha ka 29 Tarik Naiweing 2024, ki nongialam ka TMC na Nongthymmai Constituency ki la mih noh na ka party TMC bad leit ban pyniasoh sha ka Congress.
Haba kren halor ka jingpyniasoh jong u sha ka Congress, u Bah Pyngrope u la ong ba haduh mynta ym pat ioh kano kano ka jingiakren na kano kano ka party kynthup na ka Congress.Halor ka Congress u Bah Pyngrope u la ong “naduh u snem 2022 nga la ong ba ka Congress ka donkam ban don ka jingiatreilang bad haba nga ieh ia ka party ki la kylli ba ka Congress ka dei ka lieng kaba la jan ngam nga la ong ba ka Congress kan ym ngam hynrei ka donkam ia u captain u ba bha u ba lah ban ñiah ia ka lieng” .
Haba Kylli halor ka jingialam u Bah Pala, u Bah Charles Pyngrope u la ong "ngam dei uei uei ban bishar ia kata, hynrei ka dei ban bud ia ki kyndon, haba nga dang don ha ka Congress 30 snem, ka Congress ka ju bud ia ki kyndon treikam hynrei mynta kam long shuh kumta, bad wat ki kyndon ban jied President ruh ki khlem bud, te lada ki bud ia ki kyndon baroh kiei kiei baroh kin iaid beit iaid ryntih".
Shuh shuh u la bynrap "Ka Congress ka dei ka party kaba la slem bha bad ka donkam ban iaid katkum ka jingkylla ka por bad kaba donkam ka long ban bud ia ki kyndon treikam ka seng, da kaba kdew ruh ba ym don jingeh ban trei badno badno ruh kynthup ia u Bah Pala. U la kren shai ruh ba kam shym la don kano kano ka jingphah ktien ban pyniasoh na kano kano ka party bad nga dang dei u President ka TMC.Halor ka Rehabilitation center, u Bah Pyngrope u la ong “kane ka dei ka mat kaba la ju iakren hapoh ka ïing Dorbar bad nga sngew ba ka Sorkar ka la dei ban shna noh ia ki Rehabilitation center ha man ki District, bad ym dei ban shaniah ia ka jingsumar ha ki rehabilitation center jong ki riewshimet.”.
Halor ka jingshah rem ka kyrtong TMC ha ka election shiteng samoi ha Gambegre, u Bah Charles Pyngrope u la ong ba lada phai sha ka por ba la dep ruh ka party kaba don ha ka bor kaba ju ioh ia ka jingjop, bad ka TMC ka la iakhun tyngeh hynrei kam shym la jop te ym lah ban leh eiei.Halor ka VIP culture, u Bah Charles Pyngrope u la ong ba um kyrshan ia kane bad u sngew ba ym dei ban don ki VIP culture ym tang ha Shillong ne Meghalaya hynrei ha baroh kawei ka Ri, namar ki paidbah ki dei ki VIP ym ki nongialam namar ki nongialam ki dei tang ki nongtrei jong ki .