Hadien ba ka Voice of the people’s party (VPP) ka la ioh ia ka jingjop kaba la pynkyndit ruh ia ki seng saiñ pyrthei kiba bun ha kane ka Elekshon MDC, mynta ka kynti kane ka seng hapoh ka jingialam u President Bah Ardent Miller Basawiamoit ka la pynlong ia ka jingialang bad rai ban thaw hi marwei ia ka Executive Committee (EC) ha KHADC khlem da synrop bad kano kano ka seng.
Ha kane ka jingialang kaba dei ruh shi sngi shwa ba ki MDC ba thymmai kin bam smai, la jied ia ki dkhot ba thymmai ban ïalam ha KHADC, kynthup ia u Bah Shemborlang Rynjah (MDC Langkyrdem -Laitkroh) kum u Chief Executive Member (CEM), Bah Strong Pillar Khajana (MDC Mawkhar-Pynthorumkhrah) kum u Chairman, Bah Kynjohlang Rangtong (MDC Mawhati) Deputy Chairman, katba ki dkhot ha ka EC ki long u Bah Powell Sohkhlet, Bah Seiborlang Warbah, Bah Isynei Hing, Bah Pynkhraw Kharjahrin, Kong Aibandaplin Lyngdoh Nonglait, Kong Deity Majaw bad Bah Winston Tony Lyngdoh.
Ha kane ka sngi u Bah Ardent Miller Basawiamoit u la ong ba ka party kan ieng beit ha ka Nongrim kumba ka la leit ban pynshai paidbah da kaba pyntikna ba ka VPP kan pynurlong ia ka jingkwah jong ki paidbah ban iohi ia ka jingkylla ha synshar khadar bad ban pynduhjait ia ka jingpynlutphut ia ka pisa paidbah, “kumba ngi la ong ba ngin leit ban pynkhuid ngin leit ban pynbha ngin pyndonkam ia ki lynti ban pyntreikam kumno ban leh ei ei ban pynbeit ia ki kynrum kynram watla ka dei ruh ia ngi ban ngin hap ban shim ia ka sienjam ba eh pyrshah ia kita kiba pyndonkam bakla ia ka Bor bad ka Pisa tyngka ha KHADC” ong u Bah Ardent.
Haba phai pat ha ka jingkynrum kynram ha ka thungkam thungjam, u President u la ong ba ka party kan review ia kane ka bynta bad ka EC ba thymmai kan leh ia kaba donkam lada lap ia ka jingdkoh.
Ha kaba iadei pat ha JHADC, u Bah Basawiamoit u la ong ba ka party kan shong ha ka liang pyrshah kata ban ym iakhleh khaw lang bad ka NPP kaba la jop bun shuki ha JHADC.