Ka jingialehkai na ka bynta ka lympung 2nd Division Mawkyrwat District Sports Officer (MDSA) ka la bteng biang hadien ba la pynsangeh noh na ka jingïalehkai ha ka lympung Meghalaya State League (MSL) kaba dang shu sdang shen.Ia kane ka lympung la pynlong ha madan MDSA mini stadium, Mawkyrwat South West Khasi Hills.
Ha katei ka jingialehkai ka Wahkaji S&CC ka la ioh ban khur 2 poiñ lyngba ka jingjop ia ka Domtynrong YC&CC da 2-1. Ka jingialehkai ka long kaba itynnad bad kaba pynshongshit ia ki jingkyrshan. Baroh 2 tylli ki kynhun ki la wan da ka jingpynkhreh ryngkat ka jingangnud ban ioh pynkhih jar, bad tang hapoh 6 minit u rangialehkai ka Wahkaji, u Daphrangbha Langrin u la kum thep hi ia ka kol (own goal) bad katei ka kol ka la ai mynsiem ia ki rangialehkai ka Domtynrong ban iakhun kham tyngeh. Watla ka Wahkaji ka khlem ioh pynphai ia katei ka kol ha ka kylla step, hynrei la sakhi ba ki la iakhun tyngeh bad khlem da pynlehnohei ki la ioh ia ka kabu ban pynphai noh shi kol lyngba u Dibas Rani ha ka minit ba 65.
Katba ka jingiakhun ka dang bteng ka Wahkaji ka la nang ioh bor shuh shuh bad ha ka minit ba 81 ki la ioh sa shi kol lyngba u Lumdingwell Langrin kaba dei ruh ka kol kaba pynskhem ia ka jingjop ha katei ka jingiakhun.
Ka Wahkaji kan bteng biang ia ka jingialehkai na ka bynta kane ka lympung ha ka 21 tarik Naiwieng pyrshah ia ka Demnar SC.