Ka Jaiñtia Arm Wrestling Association (JAWA) mynta ka sngi Balang 20 tarik u Naiwieng kala pynlong ïa ka ‘Open Arm Wrestling Championship 2024’ ban jied ïa ki Nongïakhun Kti kiba dei napoh ka Ri-Lum Jaiñtia Hills ki ban leit ïashim bynta haka 6th Meghalaya Games ka ban sa long ha Jaiñtia Hills District ha u snem ban wan 2025.
Ïa kane ka jingïakhun Kti la pynlong ha District Library Auditorium Mynthong, Jowai hashwa kane la don ka jingïalang ba lyngkot, ha kaba u Officer Incharge ka Jowai Police Station ma Sunday Manner ula long kum u kongsan, haka jingdonlang u ma Iahmi-o Khyriem (muktiar) kum u symbud kongsan, u President ka JAWA ma Yoosar Kynjing nalor kiwei de, ïa ka jingïalang la pynïaid da ka Vice President ka seng ka Pretty Lyngdoh.
Baroh ki nongïakhun kti napoh ka napoh ka Ri-Lum Jaiñtia (Shynrang bad Kynthei) kiba la wan ban ïashim bynta mynta ka sngi kila don haduh 75 ngut.
La pyntip kiba jop ha kane ka ‘Open Arm Wrestling Championship 2024’ bala pynlong mynta ka sngi, kin ïoh lad ban leit ïashim bynta haka 6th Meghalaya Games kan ban sa long ha u snem ban wan. Ïa ki khusnam sha ki nongjop la sam da u kongsan jong kane ka sngi ryngkat u symbud kongsan nalor kiwei de.
Haka liang ki Shynrang ïa ka nam jop (Championship) la jop da u Damewanhi Kharjana (55 above) na Loompyrdi Iongpiah, Jowai kiwei de kiba wan ba nyngkong kata u Elimon Langstang (65 below), u Riphaitki Sayoo (65 above), u Tenny Ferson Langstang (60 below), u Heipormi Talang (55 below), u Ranchar D Shullai (75 above), bad u Defender Samati (75 below).
Ha ka liang ki kynthei ïa ka nam (Championship) la jop da ka Monika Syntem (55 above) na ka shnong Samatan, kiwei de kiba jop ha ka kyrdan ba nyngkong ki long ka Wanika Sungah (57 below), ka Ewandaka Lytep (55 below), ka Heimonmi Rymbai (70 below) bad ka Ritreka Passah (70 above).
Na ka liang u kongsan ma S. Mannar haba ai jingkren ha kane ka sngi ula pynpaw ka jingsngewkmen ba ïohi ïa kum kane ka rynsan bala pynlong hapoh ka District bad kane ka long shi bynta ba sei pyrthei ïa ki samla ka District kiba don shisha ïa ka sap ka phong ha kum kane ka jait jingïalehkai.
U kyrmen skhem kiba jop nang ne kin bteng shuh shuh ïa ka jingjop ha ki jingïakhun jong ka 6th Meghalaya Games bad sha kiwei de ki kyrdan ba kham shalor.
Ula ong ruh haka por ba ïakhun dei ban don ïa ki buid ki budia lyngba ki jingïoh jinghikai na ki rang ïalehkai kiba la jop ha kum kine ki jingïakhun namar ka jingkhlaiñ kam shong than ha ka jingheh jong ka met.
Shuh shuh ula pynpaw ka jingsngewkmen ban ïohi ïa ki samla kynthei napoh ka District kila mih shakhmat ban ïashim bynta ha kum kane ka rynsan bad da ka jingdon kane ka Association kan plie lad ïa ki khun samla kiba don ka sap ïakhun kti.
