Ka Dorbar Lyiur jong ka Jaiñtia Hills Autonomous District Council (JHADC) kaba la long mynta ka sngi 8 tarik u Naitung, 2024 kala kut noh tang hapoh 50 minit, kaba la sdang naduh ka por 10 baje shiteng mynstep, ïa kane ka Dorbar la pynïaid da u shnongknor ka JHADC u Dr. Sankey Shangpung.
Hashwa ban wan ka kynta kylli jingkylli na ka liang u MDC ka liang pyrshah ma Awhai Andrew Shullai ula pynrem ïa ka jingleh donbor shaba palat jong ka liang shynshar ka bym shym la wanrah shuh ïa ka Motion jong u ma Andrew kaba ïadei ban ïakren naka bynta ka jingbha jingmiat jong ka Council.
U ma Shullai ula kynthoh jur ïa kane ka jingleh ka liang synshar ka bym don shuh ïaka nongrim kaba skhem ban kyntiew ïa ka jingeh ka Council bad ula kynthoh ruh ba ym pat lap ïa kum kane ka liangshynshar kaba la kyntait ïa ki jingdonkam ban ïakren ïa ki mat ba wanrah ka liang pyrshah, da kaba ong lada kumne kam donkam satia ban pynlong ïa Dorbar, ong ma Shullai.
Hadien ka jingkren pynrem u MDC ïa ka liang synshar ula mih jyndat noh napoh ka ïing dorbar da kaba ong kam donkam ïa u ban shong khlem da ïoh ban ïatai ïa ka jingdonkam bad kane ka long kum ka jingpynjah burom ïa ka Dorbar.
La don ruh ka kynta kylli jingkylli katkum bala pynbeit naduh u ma A.A Shullai u bym shym la don shuh haka dorbar, na ka liang u ma R. Synkon ula buh jingkylli na ka EC haduh katno ka jingïohlum khajna (revenue) bala ioh lum da ka JHADC da ka jingai NOC na ka jingpynlong ia ki jingiakop khwai dohkha bad ka jingdei ia ki dohkha hapoh ka 1 tarik u April, 2022 haduh 30 tarik June 2024 ka jubab na u EM ka long Rs. 3 20,700 bad Rs.3 25,150 tyngka. Katba na ka liang u ma B. Chyrmang ym shym la wanpoi sha ka dorbar ban pynsngew ïa ki jingkylli jong u.
U CEM ka JHADC ula pynsngew ruh ia ka Official Report ban pynkiew kyrdan ïa ki ar ngut ki ophisar ka Council ia u ma H. Pariem kum u Deputy Chief Forest Officer bad u ma D. Pohchen kum u Chief Executive and Administrative Officer.
Kum ka dak ban kynmaw burom ïa ki arngut ki MDC kiba la khlad noh u (L) Saron Ksoo bad u (L) Philemon Lyngdoh la pynlong ka jingsngap jar kaba shipor bad ha ka juh ka por ka Dorbar kala rai ban phah ruh ïa ka jingsngewlem sha kiba ha ïing jong kitei ki ar ngut ki MDC.