Mynta ka sngi ki nongshong shnong kiba dang hap hapoh ki saw tylli ki Kur jong ka ‘Raij Buam’ kiba kynthup ïaka kur Buam, Khyriem, Surong bad Sumer kila mih paidbah daka jingthmu ban leit khang noh ïaka jaka jngohkai pyrthei kaba paw bha ha ka thaiñ War Jaiñtia ka ‘Krang Shuri’ kaba jngai 30 km na sor Jowai.
Ïa kane ka jingthmu leit khang ïa ka Krang Shuri la lah ban teh lakam da ka jingwan poi u Magistrate ka Amlarem, u SDPO Amlarem bad ka kynhun Pulit kiba la ïakren sngewthuh jingmut bad pan por haduh ar sngi ban pynbeit ïa kane ka kam da kaba khot jingïalang haka sngi kaba Balang (Wednesday) hapdeng ki ar liang kynhun ha ophis SDO Amlarem.
Ïa kane ka Kshaid Krang Shuri la aiti ban pynïaid ïa ki kam ki jam hapoh ka jingpeit jong ka Raij Buam naduh u snem 2010 tad haduh mynta, hynrei daka jingbym sngewthuh jingmut lang hapdeng ki ar kynhun kala pynlong ïa ki ban ïamih paidbah mynta ka sngi nyngkong 10 tarik u Jylliew, 2024.
Kine ki paidbah jong ka Raij Buam kiba don da ki spah ngut kila mih mynta ka sngi kynthup naduh ki longkpa, ki longkmie bad ki khun samla na ki saw tylli ki shnong jong ka Skentalang, Umladkhur, Jaraiñ bad ka Thangbuli kiba la pynlong shwa ka jingïalum paidbah ha madan bol jong ka Shnong Umladkhur, West Jaiñtia Hills District.
Nangne kila leit mih sha surok ba leit sha Krang Shuri na Ladjaplem bad pynphai noh ïaki kali Tourist kiba thmu ban leit kai sha katei ka jaka, hadien kane naka liang ki bor pulit kila wan mar mar ban ïakren sngewthuh jingmut khnang ban nym mih kano kano ka jingïakhajia.
Hadien kane ki paidbah kila hiar beit beit sha ki bynta ka Wah ba don ka Krang Shuri da ka jingthmu ban khang syndon ïa kane ka jaka jngoh kai bad ban ïakren hapdeng ki ar kynhun kata naduh ka kynhun jong u Donbok Buam uba la kam mynta kum u Secretary ka Saw Kur ka Raij Buam u bym shem la wan poi mynta ka sngi bad ka kynhun kaba la mih paidbah hapoh ka jingïalam uba la kam Secretary ka Saw Kur ka Raij Buam u ma Albert Khyriem.
Naka liang u ma Albert Khyriem haka jingkren sha ki lad pathai khubor ula pynsngew naka liang ki paidbah naka por sha ka por kila kyntu ban khot noh ïaka Dorbar jong ka Raij Buam khnang ban ïoh jingpynshai halor ki kam kiba ïadei bad ka Krang Shuri hynrei haduh mynta ym shem la pynlong Dorbar da ki bun tylli ki snem.
Kane ka rukom treikam kala buh haka jinglyngngoh ïa kane ka kynhun kaba la mih paidbah mynta ka sngi bad kum ki paid ka kur ki kwah ba ka rukom treikam jong ka Raij kin long kiba khuid bad suba da kaba ïoh jingmyntoi lang jong baroh ki khun ka Raij Buam.
U ma Albert Khyriem ula pynsngew ba ïa kane ka kam ha Krang Shuri la pynïaid tang da ki katto katne ki longïing khlem da don kano kano ka jingïatip lang jong ki khun ka Saw Kur, kino kino ki kam pynroi kiba wan ha katei ka jaka la tip tang da ki katto katne ka longïing ba bat jubor ha kti ïaka kam.
Shuh shuh ula ong naduh u snem 2010 ka rukom treikam jong ka Raij Buam ka long kaba ïaid beit ïaid ryntih khlem da don kino kino ki jingthuh haka rukom pynïaid kam, hynrei naduh u snem 2014 la shimti u ma Donbok Buam kum u Acting Secretary kala mih shibun ki jingbym sngewthuh jingmut ha ka rukom pynïaid kam da kaba shim beit ïaka bor ha kti haba leh ïa kino kino ki kam, la kynthoh u ma Albert.
Ula ong ka jingshimti jong u Donbok ïaka bor naduh 2014 ïa ki kam ka Raij Buam la leh tang da ki katto katne ngut khlem ka jingïatip lang ki khun ka Saw Kur bad bunsien kila lum ïa ka Committee Raij da kaba leh tang da ki katto katne ngut.
Na ka liang jong u ma Albert Khyriem uba la kam kum u Secretary ula pyntip ba kane ka jingbym sngewthuh jingmut ha ka rukom treikam, na ka liang jong ki naka por sha ka por kila dep ban ujor ban pynbeit noh ïa ka sha ki bor sorkar bad kumjuh sha ka District Council hynrei haduh mynta ym lah satia ban pynbeit ïa kane ka kam.