Ka Dorbar Ki Waheh Kur Ka Ri Jaiñtia kaba la long haka 27 tarik Naitung, 2024 ha Yungwalieh ka Dorbar Chnong Chilliangraij kala long kaba ïaid beit ïaid ryntih, ha kaba ki nongïalam kur bapher bapher hapoh ka Ri Jaiñtia kila wan sha katei ka jingïalang ban ïa phylliew jingmut lang.
Ha kane ka sngi la wan ban donlang naduh u ma Erwin Khnong Sutnga uwei na ki muktiar ba paw nam ka bri u hynñiewtrep hynñiewskum, ki nongïalam ka Synjuk ki Rangbah Kur na thaiñ Ribhoi kynthup ïa u Rgh. P.Syiem, Adivser, Rgh. R.R. Makdoh, President SRKBH, kumjuh kiba na Khasi naduh u Rgh. R.L.Kharpran, Acting President SRKBH Sengkmie, Shillong, Rgh. Aristotle Lyngdoh, General Secretary, SRKBH Sengkmie, Shillong bad kiwei.
Ha kane ka Dorbar Ki Waheh Kur Ri Jaiñtia la ai jingbatia bniah na ki riew shemphang kiba kynthup naduh u Dr. H.H.Mohrmen, ka Dr. Wa i Sa Sumer bad u ma Erwin K. Sutnga katba u Rgh. P.Syiem, Adviser Synjuk Ki Rangbah Kur Bri Hynñiewtrep, Ribhoi, Rgh. Aristotle Lyngdoh, General Secretary Ki Rangbah Kur Bri U Hynniewtrep bad u Rgh. R.L.Kharpran, Acting President SRKBH Sengkmie kiba la ai ki kyntien kitbok kitrwiang ïa ka Dorbar Ki Waheh Kur Ri Jaiñtia ba kan nang trei shakhmat.
Haka jingïakren jong ki nongïalam kur hapoh ka Ri Jaiñtia ha kane ka Dorbar la mih ka sur halor ka jingkyrpang ka jaitbynriew kaba ai jait sha ka kmie, kumjuh ruh ban don ka jingïatylli ban pynbor ïa ka JHADC bad ka ophis u u Deputy Commissioner halor ki mat kiba la dep dawa katkum ki kyndon bala pynkup bor ha ka Six Scheduled jong ka Riti synshar ka Ri India.
Ha kane ka Dorbar Ki Waheh Kur Ri Jaiñtia la ïoh ruh ban pynskem ïa u ma G. Bareh kum u General Secretary ba pura lem bad ki ar ngut ki Asst. General Secretary ba kynthup ïa u Jesper Bareh bad u Heimonmi Tyngkan.
Ïa ka jingïalang ha kane ka sngi la pynïaid da u ma Khroo L Pariat, President DWK-Ri Jaiñtia uba la ai ia ki kyntien lamphrang halor ka thong jong ka Dorbar, la pynsngew ruh ïa ka jingsdang jong ka jingïaid lynti ka dorbar da u G.Bareh, Asst. General Secretary, katba ïa ki kyntien ai khublei la ïoh na u ma Pyrkhat Shylla, Vice-President DWK-Ri Jaiñtia.