Ki Dkhot ka Jaiñtia Student Movement (JSM) kiba don na kylleng ka Ri-Lum Jaiñtia mynta ka sngi kila mih shitrhem ha ryngkat ki sur jingrwai sha ka jingïaid rally, bala shim bynta da ki thuk thuk ar shaka bad ki kali kaba la sdang naduh madan Mihmyntdu bad ïaid na u surok Ladthadlaboh-Iawmusiang-Mission Compound, Iongpiah, Dulong, Panaliar bad hiar shaduh wah Syntu Ksiar.
Ka seng JSM kala pynlong ïa kane ka jingïaid Rally shi bynta na ka jingkymmaw burom ïa ka lynkhuh sngi ïap ba 160 jong u Kiang Nangbah uba long u Khlawait ka Ri-Lum Jaiñtia uba la aiti ïa ka jingim na ka jingshah shynshar donbor ha ka sorkar phareng.
Na ka liang ka seng kala mih na madan Mihmyntdu ha ryngkat ka jingduwai bad a la ïaid jai jai ha ryngkat ki sur jingrwai jong ka seng shaphang u ‘Kiang Nangbah’.
Ïa kane ka jingïaid rally la ïalamkhmat da ki nongñiah thuk thuk bud sa ki kali da ki phew tylli ia seng haduh ban da poi ha Syntu Ksiar ban pynlong ïa ka jingïalang bah bad ban pynbam smai ïa ki nongkitkam ka “Central Executive Committee” ha Syntu Ksiar.
Hadien kane kila pynlong sa ka jingleit buh syntiew ha u mot sah nam jong u Kiang Nangbah katba ha ka por janmiet la pynlong ïa ka ‘1st Kiang Nangbah Motor cross Show-2022’ ha madan Iongkaskat Syntu Ksiar.
