Shi bynta na ka thong jong ka World No Tobacco Day 2024 ka ban long ha ka 31 tarik u Jymmang, ka ophis treikam jong ka tnad pule puthi ha ryngkat ka National Health Mission, Tobacco Control Cell kila pynlong ïa ka prokram kyrpang na ka bynta ki khynnah skul kaba la tip kum ka “Walk for My Meghalaya-Tobacco Free Meghalaya”.
Ha West Jaiñtia Hills District ha kine ki sngi bala dep ki khynnah skul kila mih shakhmat ban ïaid sha surok ha ryngkat ki nonghikai da kaba rah lang ïa ki placard bad ki jingpyrta ban pynpaw ïa ki jingsniew kiba mih na u Duma, Sikret bad u biri, ha ka juh ka por ki khynnah skul kila shim bynta ruh ha ka Poster Wall da kala leit tah ïa ki dur bala dep dro ha ki jaka paidbah kiba pyni ïa ka jingktah jong u duma.
Ha sor Jowai lyngba ka jingbthah jong ka tnad State Project Director SSA & Director of School Education & Literacy, Meghalaya Shillong na ka liang ki skul kiba la mih surok ban pynlong ïa kane ka prokram kiba kynthup ïa ka Seiñraij Higher Secondary School, Jowai, Seiñraij UPS, Seiñraij Govt. LPS, Panaliar Secondary School, Jowai, Panaliar UPS SSA, Panaliar Govt. LPS, Panaliar English School, Jowai bad ka Welcome Gayang Memorial School, Jowai.
Kane ka prokram kala long ruh haka dur jong ka jingiakop hapdeng ki skul kynthup ïa ki Lower Primary, Upper Primary, Secondary bad Higher Secondary Level, kumjuh naduh ki Block Level, District Level bad ka State Level bad ka tarik ba khadduh jong kane ka prokram ïakop kan kut ha ka 20 tarik Jymmang, 2024.
