Ka Angel’s Garden Park Committee ryngkat ka jingiatreilang bad ka GHM Guest House, Jowai By Pass Road, Caroline Colony, Jowai kila pynlong ia ka jingiapynkhuid ne ka Cleaning Drive mynta ka sngi (22.01.2022) kaba long shi bynta ban wanrah ia ka khuid ka jngiar jong ka Surok Jowai Bypass bad kumjuh ruh ia ki rud jong ka Wah Myntdu.
Ha kane ka prokram la iadonlang ki nongkitkam bad ki dkhot jong ka Environment Committee jong ka Dorbar Shnong Caroline Colony, Jowai, ki nongkitkam jong ka Khooid Ya Ka Wah Myntdu ryngkat lang ki nongshong shnong kiba don ha shilynter une u surok naduh Jingkieng Myntdu haduh Liar Watula (Kyor) kaba hap hapoh u pud u sam jong ka Dorbar shnong Caloline Colony.
Ha shwa ban sdang ka jingpynkhuid kala don ka jingialang kaba lyngkot harud jong ka jingkieng Myntdu ha kaba la pyniaid ia ka jingialang da u Chairman ka Committee u ma A.T. Gatphoh. La ioh ka jingkren na u ma K.L. Pariat President ka KYWM. La ioh ruh ka jingkren na u Waheh Shnong ka Caroline ma Embhahlang Lyngdoh bad ia ki kyntien ai khublei la ai da u ma G. Marshial Lamar.
Ia kane ka jingpynkhuid la sdang naduh ka por 10:00 baje mynstep bad hadien ba la dep kala don ka jingiadihsha sngewbha ha GHM Campus. Ia ki jakhlia la pyniakhlad hapdeng ki Plastic bad ki bilor bad la pynkit ha ki kali jong ka JMB ban leit bret.
